En Marea presenta unha emenda á totalidade dos orzamentos da Xunta para 2017 e propón unha alternativa en defensa dos dereitos sociais

O grupo parlamentario presentou hoxe unha alternativa ós orzamentos do PP centrada nun Plan de Emerxencia Social.
Por o 29/12/2016 | Sección: En Marea,Política,Vigo
En Marea presenta unha emenda á totalidade dos orzamentos da Xunta para 2017 e propón unha alternativa en defensa dos dereitos sociais

En Marea considera que os orzamentos son un instrumento de goberno e demostran cal é as prioridades dun goberno. Por iso En Marea presentou unha menda á totalidade dos orzanentos cunha prioridade irrenunciable: recuperar o nivel de investimento social previo á crise, polo que presenta unha proposta alternativa á do PP que cuantifica en 2.600 millons de euros a contía necesaria para  recuperar durante os vindeiros catro anos os dereitos sociais perdidos dende que goberna Feijóo.

A proposta de En Marea, que pretende mediante a emenda á totalidade darlle a volta ós orzamentos da Xunta,  plantexa nas contas para 2017 un incremento aproximado aos 700 millóns de euros financiados a través de varias vías. Por un lado, facendo unha estimación rigorosa das achegas do Estado derivados do financiamento autonómico (250.000.000€) e cun incremento das contías procedentes do Fondo de Compensación Interterritorial (50.000.000€). Pero tamén xerando novas figuras impositivas ás rendas máis altas e de capital e a través da loita contra a fraude fiscal (200.000.000€). A maiores, En Marea propón unha redución de gasto en partidas que non sexan prioritarias dende a perspectiva da xustiza social, coma as destinadas a profesores de Relixión ou á Cidade da Cultura.

O obxectivo da alternativa de En Marea é, como dixo Carmen Santos, “elaborar un orzamento pensando na xente, priorizando as necesidades da cidadanía galega a través dun Plan de Emerxencia Social coas seguintes propostas estratéxicas cunha dotación económica concreta”:

  • Loita contra a pobreza e a exclusión social (168.391.897€), contemplando unha Renda Social Galega e un plan de combate da pobreza enerxética.
  • Mellora da Sanidade Pública (104.800.000€): Rescate Alvaro Cunqueiro, melloras nos hospitais públicos, construción de novos centros de atención primaria e reposición de persoal sanitario.
  • Creación de emprego e loita contra a precariedade (65.610.000€)
  • Recuperación dos sectores primarios : Medio Rural (44.144.000€), Mar (30.400.000€) e recuperación Medioambiental e Saneamento (41.000.000€)
  • Garantía do acceso a vivenda e loita contra os desafiuzamentos(24.500.000€)
  • Rescate do ensino público (66.256.000€)
  • Loita contra a violencia machista (20.500.000€)

Sabemos que é posible xerar riqueza respectando os dereitos sociais”, reivindicou Luís Villares na rolda de prensa. “Os recortes son a opción económica e ideolóxica do Partido Popular, pero existe unha alternativa, uns orzamentos comprometidos social e economicamente cos dereitos da xente”, concluíu o voceiro do grupo parlamentario En Marea.

Estamos perante un orzamento restritivo e antisocial que desprotexe a cidadanía”, sinalou o deputado Manuel Lago, “e insírese na liña estratéxica da dereita neoliberal que lle resta peso ó Estado desfiscalizando as rendas altas e de capital mentres centra os seus recortes en Sanidade e Educación”.

Emendas aos Orzamentos para Santiago
O vicevoceiro de En Marea Antón Sánchez e a deputada Luca Chao mantiveron hoxe unha xuntanza co alcalde de Santiago Martiño Noriega e a concelleira de Facenda María Rozas para definir as emendas aos orzamentos da Xunta que vai presentar o grupo parlamentario e que lle afectan á capital galega.

En Marea reclamará un aumento nas partidas destinadas a asumir os gastos derivados da capitalidade, para infraestruturas como a Estación Intermodal e a variante de Aradas, ademais da recuperación de vellos proxectos como a Escola de Idiomas a ampliación do Conservatorio de Música. Asemade. o grupo parlamentario pediralle ó goberno galego que asuma as súas competencias e inclúa nas contas un centro de atención para as persoas sen fogar e recursos para vivenda de protección oficial.