En Marea recrimina no pleno a corrupción e o abandono de Galicia do Goberno de Rajoy

Publicado por o día 14/06/2017 na sección de En Marea,Política,Vigo

En Marea recrimina no pleno a corrupción e o abandono de Galicia do Goberno de Rajoy

O voceiro de En Marea no Congreso, Antón Gómez-Reino, recriminou este mércores no debate da Moción de Censura a corrupción e o abandono de Galicia por parte do Goberno de Mariano Rajoy.

“Desde En Marea imos censuralo! Pola súa corrupción, pero tamén polas súas políticas, especialmente en Galicia, onde reduciron o investimento máis dun 30% nos últimos orzamentos”, denunciou Gómez- Reino.

O voceiro de En Marea preguntou ao Goberno de Rajoy cal era o seu plan para Galicia.

“Parécelle normal destrozar as rías, permitindo a súa contaminación e deixar que os seus amigos de ENCE sigan contaminando 60 anos máis? Parécelle normal abandoar os nosos sectores produtivos? Parécelle normal impedir a transferencia da AP-9, a pesar de que o PP votase a favor en Galicia? Parécelle normal desmantelar o noso sistema bancario, primeiro coas caixas e esta mesma semana co Banco Pastor? Parécelle normal que non teñamos trens de cercanías?”, preguntou Gómez-Reino ao Goberno, ante a ausencia total de resposta.

O deputado levou as reivindicacións das galegas e galegos ao Congreso e plantexou os retos de cara ao futuro.

“Temos retos clave para o futuro: económicos, sociais, democráticos e plurinacionais”.

Gómez-Reino insistiu en que En Marea ten claro as solucións ao reto social e económico, recordando que os nosos concellos do cambio están reducindo débeda ao tempo que aumentan o gasto social.

No reto democrático, aportamos unha gobernanza transparente e con corrupción 0, como acontece onde gobernamos.

“Galicia é un suxeito de Cambio. Nós aportamos solucións ao reto plurinacional apostando polo diálogo, a fraternidade e o dereito a decidir”.

As cifras do PP

En Marea lembroulle a Rajoy que, mentras eles lle regalaban soberanía á Troika ou estaban en casos de corrupción, a cidadanía empobrecíase e aumentaban as desigualdades.

“No último ano, a fortuna de tan só tres persoas equivale xa á do 30% máis pobre do Estado, máis de 14 millóns de persoas”, insistiu Gómez-Reino, recordando que a desigualdade de renda medrou no Estado 20 veces máis que o promedio europeo.

Neste tempo, aumentou tamén a precariedade, con salarios 9 puntos por debaixo dos niveis de 2008.

O voceiro de En Marea tamén destacou a necesidade de dotar de recursos a loita contra a violencia machista.

Moción de constructiva

En Marea quixo ver esta moción de censura de xeito construtivo fronte a un “Goberno destrutivo”.

“O que se cuestiona nesta moción é a capacidade de Mariano Rajoy para seguir sendo presidente do Goberno, porque perxudica as institucións e ao conxunto da cidadanía”, insistiu o deputado, lembrando que a corrupción custa á cidadanía 87.000 millóns de euros ao ano, ¾ partes dos Orzamentos Xerais do Estado.

Ante esta situación, En Marea puxo de manifesto un proxecto que loita contra a corrupción, de presente, unha alternativa responsable, transparente, solvente e de futuro.