En Marea rexeita a concesión do premio Princesa de Asturias á Unión Europea

A UE é galardoada cun premio á Concordia mentres incumpre os acordos internacionais e a Declaración dos dereitos humanos.
Por o 22/06/2017 | Sección: En Marea,Política
En Marea rexeita a concesión do premio Princesa de Asturias á Unión Europea
Compartir en:

En Marea rexeita a concesión do galardón Princesa de Asturias da Concordia 2017 á Unión Europea. Non só non podemos compartir esta decisión senón que consideramos vergoñento premiar unha institución que non cumpre cos acordos internacionais e incumpre a Declaración de dereitos humanos que subscribe.

Como denunciabamos a pasada fin de semana na cidade da Coruña, no marco de ACAMPA,  xunto a outras organizacións políticas, sociais e a propia cidadanía, En Marea non pode parabenizar as políticas europeas no ámbito social e humanitario, políticas que como xa expresamos en múltiples ocasións non nos representan na medida que non garanten  dereitos e pasan sen reparar pola traxedia que vivimos ás portas de Europa.

Non podemos entender nin compartir os criterios dun xurado que considera que os valores da libertade, os dereitos humanos e solidaridade son defendidos co levantamento de muros da vergoña e a inacción durante meses das institucións europeas ante a centos de vítimas mortais no porche da casa.

Fronte a isto, En Marea pide unha vez máis á UE que escoite o clamor da cidadanía e elabore e implemente políticas para as persoas que si proxecten esperanza de futuro, en tempos de incertidume.