Marea de Vigo cualifica como moi preocupante a utilización da planta de PSA de Vigo como ameaza ao cadro de persoal da planta de Zaragoza, xa que evidencia que a factoría viguesa é exemplo de precariedade laboral

Rubén Pérez: “é lamentable que se empregue o termo ‘diferencial Vigo-resto de fábricas’ para ameazar ao cadro de persoal ou mesmo para rexeitar calquera proposta dos sindicatos, como a lóxica petición de subida salarial anual equivalente ao IPC ou a pausa de descanso no medio da xornada laboral. Isto o está facendo a dirección o grupo PSA en Figueruelas nos escritos ao seu comité de empresa, mais o realmente preocupante son as condicións que motivan esa denominación, que non veñen explicar outra realidade que a precarización que está a sufrir a planta de Vigo xa desde hai uns anos”
Publicado por o día 29/01/2018 na sección de Marea Vigo,Política

Marea de Vigo cualifica como moi preocupante a utilización da planta de PSA de Vigo como ameaza ao cadro de persoal da planta de Zaragoza, xa que evidencia que a factoría viguesa é exemplo de precariedade laboral

Marea de Vigo considera que as “cada día máis precarias” condicións laborais na factoría do grupo PSA en Vigo, onde se externalizan procesos e postos de traballo coa escusa de “creación de centro especial de emprego”, están sendo un experimento laboral para condicionar convenios e negociacións en diversas plantas, expresado sen pudor, neste caso, ante o comité de empresa da factoría de Figueruelas facendo uso do concepto “diferencial Vigo-resto”.

“PSA ten que deixar de ensuciar o nome de Vigo por Europa adiante equiparando a cidade co seu laboratorio de precariedade. Lembrámoslle ao Grupo que a cidade ten feito esforzos encomiables para satisfacer as necesidades e plans industriais do grupo. Mesmo o goberno autonómico improvisou unha lei, chamada coloquialmente “lei Vigo”, en realidade “lei de Medidas en Materia de Proxectos Públicos de Urxencia ou Excepcional Interese Público” para permitir de facto a reordenación urbanística do ámbito do polígono de Balaídos. Vigo responde e PSA debería crear emprego de calidade na cidade e non exportar modelos de explotación e miseria cos que ameazar ao resto das plantas do grupo industrial” engade Rubén Pérez, voceiro do Grupo Municipal.

Marea de Vigo amosa a súa solidariedade cos traballadores e traballadoras da planta de Figueruelas así como felicita as seccións sindicais e membros do comité de empresa de PSA Vigo que amosaron a súa solidariedade e disposición a defender os dereitos das e dos compañeiras/os de Zaragoza desde Vigo.

NOTICIAS RELACIONADAS: