Publicado por A directora xeral de Administración Local, Natalia Prieto, e a delegada territorial da Xunta de Galicia en Vigo, Marta Fernández-Tapias, desprazáronse hoxe ata a asociación de veciños Feira de Cabral, para coñecer as melloras que se levaron a cabo ao abeiro da orde de axudas do Goberno galego.
Esta entidade recibiu 16.039 euros no marco das subvencións incluídas no Plan de acción comunitaria, que destinaron a arranxos na cuberta e a fachada, mediante a reposición das plaquetas, e á compra de material informático.
Durante a visita, ambas as dúas representantes puxeron en valor a colaboración coas asociacións veciñais nunha aposta clara por parte do Executivo galego na procura dunha mellora na calidade de vida local.
A orde estivo dotada este ano con 2,5 millóns de euros, o que permitiu chegar a 190 asociacións de toda Galicia. Na área de Vigo, o número de entidades beneficiarias ascende a 47, ás que se destinou case 624.000 euros.
Ademais, nos últimos cinco anos, o investimento da Xunta acadou preto de 10,5 millóns de euros destinados a financiar 978 proxectos de asociacións de veciños, de mulleres rurais e de comunidades de usuarios de augas. As axudas van dirixidas a financiar tanto obras nos locais sociais e instalacións comunitarias como á adquisición de equipamentos, así como a reparación de traídas de auga veciñais.
Sárdoma e Navia
Nos últimos días, Fernández-Tapias visitou outras dúas asociacións veciñais en Vigo, a do Carballo de Sárdoma e Emilio Crespo de Navia, que recibiron sendas axudas de 17.000 euros. No primeiro caso a organización investiu a axuda en obras de mellora e adaptabilidade da sede, así como á compra de equipamento informático.
En canto á asociación veciñal Emilio Crespo de Navia utilizaron a achega recibida para a reforma da cafetería e doutros espazos comúns de utilidade dos socios.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
