Máximas garantías no sistema de votación das primarias de En Marea

Existen múltiples niveis de supervisión que coidan da limpeza e seguridade do proceso
Publicado por o día 18/08/2016 na sección de En Marea,Política

Máximas garantías no sistema de votación das primarias de En Marea

Os resultados provisionais da votación faranse públicos mañá, antes das 19.00 horas. Os definitivos coñeceranse o sábado 20 de agosto.

O sistema de Agora Voting, elixido para desenvolver as votacións das primarias de En Marea para a candidatura ao Parlamento de Galicia, conta coas máximas garantías de limpeza e seguridade. Trátase dunha plataforma de voto electrónico, con anos de experiencia contrastada, que emprega diversos sistemas de cifrado e control para evitar erros e posibles fraudes. O reconto será realizado por dúas entidades certificadoras independentes e o resultado final contará co aval do Comité Electoral.

Cada votante é identificado polo seu documento de identidade e polo seu número de teléfono, no que recibe unha mensaxe cun código que lle permite exercer o seu sufraxio. Mentres estea aberto o prazo, o sistema permite acceder de novo para corrixir erros ou cambiar o voto, pero só conta como válido o último emitido.

As persoas poden acceder ao sistema de voto desde dous puntos de inicio: directamente Agora Voting ou a través da web de Podemos, pero independentemente do sistema de inicio elexido, o voto efectúase nunha única plataforma de Agora Voting. Por iso, aínda que se vote varias veces, só conta o último sufraxio emitido.

Os votos están encriptados desde o mesmo momento no que a persoa os envía. Isto garante a súa confidencialidade e proporciona unha serie de datos adicionais que permiten detectar posibles fraudes coma o sufraxio masivo con identidades falsas: IP, horas de votación, ubicación e outros parámetros. Con esta información, dúas entidades auditoras independentes, que non pertencen a Agora Voting nin a ningunha das partes que concorren ás primarias, coidan a limpeza do voto.

O peche do prazo de participación será hoxe as 23.59h. O reconto comezará mañá, 1 as 9.00h. Unha vez pasados os algoritmos de supervisión, os resultados en bruto serán revisados polo Comité Electoral, tal e como está previsto no regulamento de primarias, para que as candidaturas definitivas das catro provincias respecten a paridade de xénero.

Os resultados provisionais faranse públicos mañá, venres, a partir das 19.00h. Abrirase entón un prazo de reclamacións e o sábado 20 de agosto daranse a coñecer as candidaturas definitivas.

Cómpre aclarar, tamén, que o censo de participantes nas primarias está pechado desde o martes 16 de agosto ás 23.59h. Porén, como parte do acordo que permitiu a incorporación de Podemos Galicia ao espazo político de En Marea, mantense a posibilidade de que as persoas que estaban inscritas no censo das primarias de Podemos -pechado o 4 de agosto- participen agora neste proceso. O requisito para facelo é que cada persoa, de xeito individual, acepte que os seus datos pasen a formar parte do censo de En Marea, ademais de asumir os principios básicos e o manifesto dos alcaldes.