Medio Ambiente estudará a posibilidade de simplificar o proceso de inscrición de aves rapaces no Rexistro Galego de Identificación

A directora xeral de Patrimonio Natural, Belén do Campo, reuniuse co delegado da Asociación Española de Cetrería e Conservación de Aves Rapaces na comunidade e varios criadores profesionais para analizar as principais demandas do colectivo
Publicado por o día 06/04/2019 na sección de Medio Ambiente

Medio Ambiente estudará a posibilidade de simplificar o proceso de inscrición de aves rapaces no Rexistro Galego de Identificación

A Consellería de Medio Ambiente, Territorio e Vivenda analizará a posibilidade de axilizar e simplificar o proceso de inscrición das aves rapaces no Rexistro Galego de Identificación de Animais de Compañía (REGIAC), un censo no que os criadores destas especies están obrigados a rexistralos en aplicación da Lei 4/2017 de protección e benestar dos animais de compañía en Galicia.

Esta foi unha das conclusións da reunión que mantiveron a directora xeral de Patrimonio Natural, Belén do Campo, co delegado en Galicia da Asociación Española de Cetrería e Conservación de Aves Rapaces (AECCA), Alejandro Figueroa, o secretario da Asociación Internacional de Criadores de Aves Silvestres (Aviornis), Ricardo Sobrino, e dous criadores profesionais para intercambiar impresións sobre a situación da cetrería na comunidade.

Ao respecto, os representantes do sector trasladáronlle a súa inquedanza ante a obrigatoriedade legal de inscribir no REGIAC as aves rapaces, animais que xa están sometidos ao control de cría en catividade por parte das autoridades CITES de España. Neste sentido, desde a AECCA propúxose que o rexistro destes animais no devandito censo poida facerse de oficio a partir da información da que xa dispón a Administración sobre cada un destes exemplares ou ben a través dalgún proceso informático que se poida integrar no actual módulo de xestión de aviarios do que dispón Aviornis. A directora xeral de Patrimonio Natural tomou nota da petición e comprometeuse a estudar posibles vías que axilicen e simplifiquen para os criadores o cumprimento das súas obrigas co REGIAC.

Noutra orde de cuestións, o delegado para Galicia de AECCA tamén se referiu ao permiso de tenza destes animais. Ao respecto, trasladoulle a do Campo a demanda do sector de que este permiso só se lle requira a aqueles propietarios que non sexan titulares de núcleos zoolóxicos para evitar duplicidades xa que, segundo explicou, a Xunta xa ten á súa disposición a información relativa a cada criador a través do libro de rexistro obrigatorio.

Pola súa parte, Belén do Campo invitou aos representantes do sector presentes na xuntanza a trasladar todas estas suxestións durante o proceso de elaboración do regulamento que desenvolverá a nova Lei de protección e benestar dos animais de compañía de Galicia co fin de que o seu departamento poida estudalas e analizar a súa posible incorporación.

Comentar noticia

Your email address will not be published.