Medio Ambiente estudará co colectivo de xeógrafos posibles vías de colaboración en materia de ordenación do territorio

A conselleira Ángeles Vázquez reuniuse con representantes do Colexio de Xeógrafos en Galicia e do departamento de Xeografía da Universidade de Santiago, que lle trasladaron a utilidade que poden ter estes profesionais á hora de participar en proxectos e iniciativas relativas á planificación territorial
Publicado por o día 18/01/2019 na sección de Xunta de Galicia

Medio Ambiente estudará co colectivo de xeógrafos posibles vías de colaboración en materia de ordenación do territorio

A Consellería de Medio Ambiente, Territorio e Vivenda estudará a posibilidade de contar coa colaboración do colectivo de xeógrafos para proxectos e actividades en materia de ordenación do territorio. Esta foi unha das conclusións da reunión que mantivo a titular de Medio Ambiente, Ángeles Vázquez, co presidente da delegación galega do Colexio de Xeógrafos, José Taboada, e o director do departamento de Xeografía da Universidade de Santiago (USC), Rubén Lois.

Desde o ano 2013, a única titulación en Galicia que permite a formación regulamentaria de profesionais nesta rama é o grao en Xeografía e Ordenación do Territorio que se imparte na facultade de Xeografía e Historia de Santiago de Compostela.

A especialización do alumnado deste grao, tal e como lle trasladaron os dous representantes do colectivo á conselleira, convérteos en profesionais cun perfil axeitado para traballar en proxectos relacionados coa planificación e a ordenación territorial, motivo polo que se ofreceron a colaborar coa Consellería de Medio Ambiente, Territorio e Vivenda.

Durante o encontro, Ángeles Vázquez interesouse por coñecer todas as facetas do desempeño profesional deste colectivo e amosouse disposta a estudar posibles vías de colaboración tanto co Colexio de Xeógrafos como coa USC co fin de poder contar con eles nalgún proxecto relacionado coa ordenación do territorio, un dos principais eixes de actuación do seu departamento.

Comentar noticia

Your email address will not be published.