Medio Ambiente traslada ás sociedades de pesca a súa interpretación sobre as normas estatais que avalan a pesca fluvial como actividade deportiva ao aire libre

Tendo en conta o contido a Orde SND/388/2020, de 3 de maio, pola que se regula a práctica do deporte profesional e federado, a pesca fluvial estaría dentro das actividades permitidas
Publicado por o día 04/05/2020 na sección de Medio Ambiente

Medio Ambiente traslada ás sociedades de pesca a súa interpretación sobre as normas estatais que avalan a pesca fluvial como actividade deportiva ao aire libre

A Consellería de Medio Ambiente, Territorio e Vivenda vén de trasladar ás sociedades de pesca deportiva a súa interpretación sobre os distintos documentos feitos públicos polo Goberno do Estado que avalan a pesca fluvial como unha actividade deportiva ao aire libre e individual, polo que se podería permitir a súa realización. Ao longo destas últimas xornadas, o colectivo de pescadores de pesca fluvial de Galicia ten trasladado diversas dúbidas para saber se a pesca fluvial estaba comprendida dentro das actividades permitidas pola Orde publicada no Boletín Oficial do Estado do pasado 1 de maio.

Dende a Dirección Xeral de Patrimonio Natural defenden que a pesca fluvial debe considerarse deporte individual ao aire libre, e polo tanto permitir a súa práctica, sempre e cando se manteñan as medidas se seguridade recomendadas polo Ministerio de Sanidade en canto á práctica para este tipo de actividades físicas.

Tal e como xa teñen trasladado as conselleiras de Medio Ambiente, Territorio e Vivenda e do Mar nunha carta dirixida ao ministro, Salvador Illa, a pesca deportiva cumpre todos os requisitos establecidos na Orde, xa que é un deporte que se practica en pleno contacto coa natureza e que -pola súa propia dinámica- se leva a cabo salvagardando as distancias de seguridade interpersoal recomendadas polo Ministerio de Sanidade.

Outro aspecto que se reitera desde a Consellería de Medio Ambiente é que a pesca fluvial non é unha actividade agraria, que tan só se podería exercer na fase dúas do plan de desescalada do Goberno, senón que é unha actividade física que se equipara á realización non profesional de actividades deportivas ao aire libre e sen contacto individual.

Por outra banda, o Goberno central publicou a Orde SND/388/2020, de 3 de maio pola que se regula a práctica do deporte profesional e federado, sen indicar de xeito específico os deportes federados que se poden realizar. É dicir, nesta orde non se exclúe a práctica do deporte da pesca fluvial, polo que desde a Xunta de Galicia se entende que o Estado a través da orde- un documento normativo- está a permitir a práctica da pesca, tanto na súa versión de actividade deportiva non profesional ao aire libre (pesca fluvial ou recreativa), como da pesca federada.

Comentar noticia

Your email address will not be published.