Mobilización sindical para a recuperación de dereitos na sanidade

Concentración o mércores, día 1 de febreiro, diante da sede do SERGAS
Publicado por o día 30/01/2017 na sección de CC.OO,CIG,Protestas,Sanidad,Sindicatos,UGT,Vigo

Mobilización sindical para a recuperación de dereitos na sanidade

CIG, CCOO, UGT, SAE, SATSE e CSIF compareceron esta mañá en rolda de prensa para anunciar a convocatoria dunha mobilización o vindeiro mércores, día 1 de febreiro, diante do Sergas en demanda da inmediata convocatoria da Mesa Sectorial e do establecemento dun calendario negociador de cara a recuperar as súas condicións laborais.

María Xosé Abuín, secretaria nacional da CIG-Saúde lembrou que co comezo da crise e coa chegada do Partido Popular ao goberno da Xunta de Galiza, en 2009, o persoal do Sergas viu suspendidos todos os acordos económicos e de condicións de traballo aprobados en 2008 e en anos anteriores. “Retribucións sobre todo vinculadas co traballo a quendas, penosidade, nocturnidade, gardas, festivos especiais e demais”, explicou, e que tiñan como obxectivo equiparar as súas condicións económicas ás do persoal do resto de servizos de saúde do Estado.

Esta suspensións dos acordos supuxeron, segundo explicou Abuín, unha dobre penalización para as traballadoras e traballadores do Sergas, que ademais de ver reducidos os seus salarios nun 5%, as súas pagas extra e os complementos específicos, tiveron que soportar a suspensión dos acordos retributivos, da carreira profesional e unhas condicións de traballo máis penosas.

A secretaria nacional de CIG-Saúde lembrou ademais que a daquela conselleira de Sanidade, Pilar Farjas, presentara unha proposta que contemplaba a recuperación deses acordos nos anos seguintes. “Porén desde 2009 o PP négase a falar deste tema na mesa sectorial”, denunciou.

Por iso, e diante do anuncio do propio Partido Popular de que estamos na senda da recuperación, as organizacións sindicais dirixíronse tanto ao conselleiro de Facenda, como ao de Sanidade, en demanda de que se negocie unha mellora nas condicións laborais e salariais. Demanda da que non obtiveron resposta e que é o que os levou a iniciar mobilizacións como a convocada para o día 1 de febreiro.

Igualdade de dereitos

Xunto a isto, Abuín chamou a atención sobre o incremento salarial  dun 7,5% para o Presidente da Xunta e dun 7% nas retribucións de altos cargos e denunciou que, fronte a isto, se manteñen conxelados os salarios do persoal da sanidade pública galega.

Unha situación diante da que reclamou “unha recuperación salarial na mesma porcentaxe para todos, non só para os membros do goberno do PP e para Feijoo” e fixo un chamamento a todo o persoal que “foi quen fixo posíbel que o sistema sanitario público funcionase durante todos estes anos a pesar dos recortes” a sumarse ás mobilizacións.

As organizacións sindicais esixen a recuperación «decontado» dos acordos suspendidos no 2010 —acordo retributivo e acordos de atención primaria—, a eliminación da Lei de medidas temporais para as Administracións públicas e a fin das das diferenzas nas condicións entre o persoal da sanidade pública e do persoal da Función Pública. Por último, instan a Xunta a que «acometa xa» a recuperación da carreira profesional.

O próximo mércores, día 1 de febreiro, haberá unha concentración ás 11 h fronte á sede principal do SERGAS, situada no complexo administrativo de San Lázaro (Santiago de Compostela).