Moi avanzada a obra de construción do viveiro de empresas no polígono da Veigadaña

Os traballos estarán rematados na primeira quincena do vindeiro mes de novembro
Por o 12/10/2018 | Sección: Galicia,Mos
Moi avanzada a obra de construción do viveiro de empresas no polígono da Veigadaña

A obra de construción do edificio que albergará o viveiro de empresas e servizos de apoio no polígono PEMOS-Veigadaña está moi avanzada e atoparase finalizada a comezos do vindeiro mes de novembro, dentro da primeira quincena do mes.

O viveiro contará con 4 talleres para albergar empresas de actividades vinculadas coa industria 4.0, (desde robótica, impresión 3D, procesos, investigación… etc.) zona de oficinas para atención ao emprendedor, e espazo para empresas emprendedoras en condicións ventaxosas durante un ano prorrogable a outro ano máis, con técnicos que as asisten e asesoran, orientan e axudan, acompañándoas neses dous primeiros anos de actividade empresarial. Na segunda pranta estará a zona de servizos comúns e coworking, con despachos e zonas de recepción, administración, reunión e atención; onde poder organizar desde reunións comerciais ata eventos máis ambiciosos.

O pasado mes de abril Concello e AEMOS asinaron o convenio para a creación do viveiro de empresas que está ubicado no polígono da Veigadaña e que subvenciona a consellería de Economía, Emprego e Industria con 240.000 euros.

Concretamente foi o 23 de abril cando a rexedora local mosense, Nidia Arévalo, e o presidente de AEMOS, Manuel Castro, asinaban no salón de actos da Axencia de Colocación de Mos o convenio de Colaboración entre o Concello e a Asociación de Empresarios de Mos (AEMOS) para a Execución dun Viveiro de Empresas no Parque Empresarial de Mos (PEMOS-Veigadaña).

Unha vez rematada a obra de construción do viveiro, este será xestionado directamente pola Asociación de Empresarios.

Con esta obra preténdese mellorar a xestión empresarial a través da creación dun viveiro de empresas para emprendedores a situar nunha parcela de centro terciario do Parque Empresarial de A Veigadaña, que permita descubrir e fomentar iniciativas empresariais e contemplar un tecido empresarial máis acorde coas novas estruturas tecnolóxicas e organizativas.

Para elo AEMOS  realizou a cesión parcial do dereito de superficie da parcela necesaria a favor do Concello de Mos que dá lugar á subrogación pola administración local, quen executa a edificación industrial con destino a viveiro de empresas no espazo obxecto do convenio.

O Concello de Mos asignou a axuda solicitada á Consellería de Economía, Emprego e Industria para a realización do mesmo, consistente en 240.000 euros, que representa o 80% da inversión total de 300.000 euros.

A Asociación de Empresarios de Mos aporta, de fondos propios, un importe do 20% da inversión total, é dicir, 60.000 euros.

O proxecto execútao o Concello de Mos, sendo este quen desenrola a acción, conserva a titularidade do viveiro e recibe a financiación procedente da Consellería de Economía, Emprego e Industria. Pola súa banda AEMOS encargarase da xestión e do funcionamento do viveiro.

Noticias de última hora en Vigo

Comentar noticia

Your email address will not be published.