Publicado por 
Mos foi hoxe esceario, xunto con outras 10 localidades galegas (Pontevedra, Santiago, A Coruña, Noia, Ponteceso, A Probra do Caramiñal, Lugo, Monforte, Ourense e O Carballiño) e outras 24 do resto da xeografía española, da campaña #AccesibilidadYA da Confederación Española de Persoas con Discapacidade Física e Orgánica, COCEMFE.
O acto tivo lugar ás 11.00 horas da mañá xunto á parada de autobuses de Puxeiros e asistiron ó mesmo representantes de COCEMFE, directivas e membros de ASODIFISI (Asociación de Diminuídos Físicos e Psíquicos de Mos) de Cogami, de Aceesca; así como a alcaldesa de Mos, Nidia Arévalo, a concelleira de Política Social mosense, Sara Cebreiro, e outros membros da Corporación Municipal.
Os obxectivos desta campaña son lograr accesibilidade universal en todos os produtos, contornas, bens e servizos cumprindo coa lexislación vixente, así como unha lei de infraccións e sancións que garanta a accesibilidade, implicación cidadá ante as infraccións e creación dunha estratexia nacional sobre accesibilidade, con medidas concretas e eficaces.
Esta iniciativa surxe pola existencia de barreiras en todos os ámbitos, que vulnera os dereitos das persoas con discapacidade e a súa igualdade de oportunidades. O 4 de decembro de 2017 todos os produtos, bens, contornas e servizos terán que ser accesibles, segundo establece a Lei Xeral de Dereitos das Persoas con Discapacidade e da súa Inclusión Social, motivo polo cal se decidiu tamén emprender esta campaña. A pesar de levar en vigor dende o 2013, existen moitas entidades, administracións, empresas e prestadores de servizos que non adoitaron as medidas necesarias para cumprir a lei.
Pese a que pouco a pouco se conseguiu unha maior concienciación e compromiso social, aínda queda moito traballo por diante para lograr que os municipios de España sexan o máis accesibles posible para todas as persoas. O avance existe pero aínda é insuficiente, por iso hoxe se celebrou este acto histórico de unión e de forza do movemento asociativo das persoas con discapacidade física e orgánica.
A ninguén lle beneficia a discriminación das persoas con discapacidade e a accesibilidade é un requerimento básico para garantir a igualdade de condicións para levar a cabo un proxecto de vida baseado na toma de decisión sen inxerencias de terceiras persoas. Unha sociedade baseada na accesibilidade universal facilita a participación e normalización e beneficia tanto ás persoas con discapacidade como a todas ás persoas en xeral, que poderán vivir nun mundo máis cómodo, moderno e integrador.
En definitiva, cómpre realizar unha profunda análise da situación e contemplar medidas concretas e eficaces para avanzar cara a un país libre de barreiras para todas as persoas, esixir o cumprimento da lexislación vixente e lograr a implicación cidadá ante as infraccións da mesma.
Noticias de última hora en Vigo
