Mos conta xa con cinco puntos wifi operativos

Son as zonas do Multiusos, o Pavillón Óscar Pereiro, a Biblioteca Municipal, a Axencia de Colocación e o Concello
Publicado por o día 22/03/2019 na sección de Galicia,Mos

Mos conta xa con cinco puntos wifi operativos

O Concello de Mos conta desde fai unhas semanas con cinco puntos wifi abertos para uso de todas aquelas persoas que desexen conectarse a internet dende os seus dispositivos móbiles, tablets e/ou ordenadores portátites.

As cinco localizacións son as zonas do Multiusos das Pozas, a Piscina Municipal no Pavillón Óscar Pereiro, a Biblioteca Municipal na Porteliña, a Axencia de Colocación e o Concello.

En todas as localizacións está realizada a instalación do wifi municipal que xa está operativo e dando servizo.

A instalación, promovida dende a concellería mosense de Novas Tecnoloxías, foi levada a cabo conxuntamente entre os encargados dos mantementos eléctrico e informático do Concello de Mos.

Todos os puntos de acceso están configurados coas seguintes condicións: máximo 1 MB de descarga e subida por dispositivo conectado para non sobrecargar a rede, velocidade que é suficiente para realizar consultas por internet, e concesión da conexión durante 2 horas, despois dese tempo os usuarios terán que volver a conectase.

O acceso é totalmente libre e gratuíto sen necesidade de contrasinal.

Ata o de agora só existía en Mos un punto wifi de escasa cobertura no contorno da Casa Consistorial, concretamente na Praza do Concello. Fora instalado en 2012 a través da iniciativa provincial Repoblar.

Agora, con esta iniciativa municipal, amplíanse ata cinco os puntos wifi da localidade mosense. As cinco zonas de conexión wifi libre e gratuíta son lugares de concentración de servizos e gran afluencia diaria de persoas, por iso foron elixidas estas cinco ubicacións en concreto.

Dende a administración local infórmase de que estes cinco puntos wifi son só o primeiro paso co que arranca o plan municipal de implantación de conexión wifi por todo Mos, chegando ás 10 parroquias, nas que a instalación realizaríase, entre outras, nas zonas nas que se atopan ubicadas as asociacións veciñais, culturais, deportivas, etc. existentes en cada unha delas.