Mos reforza a política de Medio Ambiente tras os recentes incendios que devastaron 300 hectáreas no termo municipal

Iníciase unha campaña de concienciación sobre a necesidade e obrigatoriedade da limpeza de fincas
Publicado por o día 22/10/2017 na sección de Galicia,Mos

Mos reforza a política de Medio Ambiente tras os recentes incendios que devastaron 300 hectáreas no termo municipal

Tras os dramáticos incendios que asolaron o pasado domingo a Mos en particular e á provincia de Pontevedra e Galicia en xeral, o Concello mosense dende a concellería de Medio Ambiente inicia unha campaña de sensibilización, concienciación e fiscalización da limpeza de fincas; obrigatoria para os/as seus propietarios/as.

Por lei os particulares propietarios/as de fincas deben acometer a xestión de biomasa vexetal (desbroce de maleza) a 50 metros dos límites das edificacións próximas e a retirada das especies arbóreas que marca a lei (entre as que se atopan piñeiros, eucaliptos, mimosas, acacias, toxos, fentos, brezo, etc.) nos 30 primeiros metros dende as edificacións próximas.

A administración local lembra aos propietarios e propietarias de todos os predios, montes e solares existentes no municipio que de conformidade co regulado pola lei 3/2007, do 9 de abril, de prevención e defensa contra os incendios forestais en Galicia, así como do regulado pola Lei 2/2016, do 10 de febreiro, do solo de Galicia e o Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, teñen a obriga de mantelos nas mellores condicións de funcionalidade, seguridade, salubridade e limpeza co fin de evitar o risco de lumes.

Para garantir a execución das devanditas labores de conservación, o Concello procederá á súa execución forzosa -en caso de incumprimento por parte dos propietarios- mediante a imposición de multas de entre 1.000 e ata 10.000 euros de conformidade co establecido na normativa de aplicación.

Deste xeito ínstase á colaboración e solidariedade cidadá, -que xa ven sendo demostrada ao longo dos últimos días co grande apoio prestado nas labores de extinción, así como nas posteriores manifestacións de apoio e gratitude-, para que a partir de agora tampouco descoiden a realización de labores de retirada de maleza que poida supoñer un perigo tanto para os bens materiais como para a veciñanza en xeral. Así mesmo, estímase necesario que os camiños estean limpos de vexetación, sendo necesario polo tanto que os/as propietarios/as dos terreos que estean fonte á vía pública procedan á limpeza dos mesmos; así como daquelas fincas que se atopen inmersas nos núcleos urbanos.

Os obxectivos de manter as propiedades libres de maleza son a prevención e defensa contra os incendios forestais en aras de evitar catástrofes coma a acaecida fai poucos días. Así como lograr o máis alto nivel de habitabilidade posible no termo municipal de Mos.

Neste sentido dende o Concello de Mos preténdese evitar que se repitan situacións coma as acontecidas o pasado domingo, cando a localidade mosense sufriu un total de sete lumes localizados en Pantaño (San Gregorio) – Pombal – San Antoíño, parroquia de Louredo; Veigadaña, parroquia de Petelos; Camiño do Carballo Queimado, parroquia de Petelos; Puxeiros, parroquia de Tameiga (un lume iniciado nunha pequena zona de monte desencadeou, ao aproximarse ao polígono industrial, o incendio na nave de ‘Hierros y Metales Mos’); Cristo do Agro, parroquia de Pereiras; Herville, parroquia de Cela, e Torroso.

Estes incendios queimaron un total dunhas 300 hectáreas da localidade mosense. Cifras que poderían ter sido peores de non ser por todas as persoas que loitaron contra os lumes: veciños e veciñas anónimos e 33 efectivos que integraron o grupo de extinción de lumes creado para a ocasión e formado por 6 axentes da Policía Local de Mos, 6 axentes da Garda Civil e 21 efectivos do Servizo Municipal de Emerxencias de Mos e da Agrupación de Voluntarios de Protección Civil de Mos.

Ademais Mos tivo a gran sorte de contar coa colaboración das Asociacións Culturais, Veciñais e Comunidades de Montes, que ofreceron as súas instalacións desinteresadamente e a altas horas da madrugada para o que fose necesario; cos profesionais médicos do Centro de Saúde, preocupados en todo momento das necesidades dos veciños de Mos, dia e noite; cos restaurantes que ofreceron un prato de comida quente aos que estaban ao pé do lume; e coas empresas de transporte e particulares que coa súa propia maquinaria, camións e cisternas achegaron litros e litros de auga ao monte de Louredo.