Mos vólcase cos colaboradores na extinción dos lumes do mes pasado

O Concello celebrou unha xornada de recoñecemento ao traballo e o esforzo realizado por colectivos, particulares e empresas durante os días 15 e 16 de outubro
Publicado por o día 03/11/2017 na sección de Eventos,Galicia,Mos

Mos vólcase cos colaboradores na extinción dos lumes do mes pasado

Onte pola tarde celebrouse no salón de actos da Axencia de Colocación de Mos unha xornada de recoñecemento ao traballo e o esforzo realizado por colectivos, particulares e empresas durante os días 15 e 16 de outubro nos que os incendios asolaron Mos e á provincia de Pontevedra e Galicia en xeral.

Estiveron presentes neste simbólico encontro de agradecemento Marcos Araújo Pereira, xerente de AXEGA (Axencia Galega de Emerxencias), Luis Menor Pérez, Director Xeral de Emerxencias e Interior, Nidia Arévalo, alcaldesa de Mos, e demais membros da Corporación Municipal mosense.

Os protagonistas da xuntanza foron as entidades e particulares colaboradores na extinción dos lumes e na salvagarda da saúde e da integridade física dos e das mosenses. Así, foron obxecto de agradecemento ás empresas colaboradoras (Urbaser, Transportes Rafael Fernández Gestido e Multiservicios Contucho) que coa súa propia maquinaria, camións e cisternas achegaron miles de litros de auga ao monte de Louredo; o persoal médico do Centro de Saúde de Mos en especial o Doutor Justo José González Ballesta (ex xefe de unidade) e a Doutora Nieves Turienzo Río (actual xefa de unidade), que estiveron preocupados en todo momento das necesidades dos veciños de Mos, día e noite; as Comunidades de Montes de Mos e Louredo(encabezadas polos seus presidentes, Manuel Barciela e Alejo Domínguez, respectivamente) volcadas na extinción do lume e na vixiancia do monte durante as terribles 48 horas do 15 e 16 de outubro; a Garda Civil e o Distrito Forestal XVIII; os 9 policías locais de Mos (encabezados polo seu oficial, Gerardo Álvarez); os 19 voluntarios/as da Agrupación de Protección Civil de Mos (encabezados polo seu presidente, Santiago Iglesias) e os 4 traballadores do Servizo Municipal de Emerxencias (encabezados polo seu encargado, Rodrigo Iglesias).

A todos estes protagonistas a rexedora local mosense, Nidia Arévalo, adicoulles unhas emotivas palabras de gratitude: “A todos/as os/as que arrimastes o ombreiro durante aqueles días de preocupación, incertidume, e desesperación nalgúns intres; asegurarvos que voso traballo foi xeneroso e loablepolo que non podemos deixar de darvos unhas grazas, con maiúscula, que de seguro son extensivas ás familias mosenses ás que defendestes do lume coma se fosen a vosa propia. Como alcaldesa de Mos síntome enormemente orgullosa de contar no noso municipio con agrupuacións e entidades como as das que formades parte, con capacidade de manter a calma ante situacións adversas e de resolver satisfactoriamente situacións de perigo. Sodes o noso orgullo, o orgullo de Mos”.

Reforzo da política medioambiental

Tras os dramáticos incendios dos días 15 e 16 de outubro, o Concello mosense dende a concellería de Medio Ambiente iniciou unha campaña de sensibilización, concienciación e fiscalización da limpeza de fincas; obrigatoria para os/as seus propietarios/as.

Por lei os particulares propietarios/as de fincas deben acometer a xestión de biomasa vexetal (desbroce de maleza) a 50 metros dos límites das edificacións próximas e a retirada das especies arbóreas que marca a lei (entre as que se atopan piñeiros, eucaliptos, mimosas, acacias, toxos, fentos, brezo, etc.) nos 30 primeiros metros dende as edificacións próximas.

A administración local lembra aos propietarios e propietarias de todos os predios, montes e solares existentes no municipio que de conformidade co regulado pola lei 3/2007, do 9 de abril, de prevención e defensa contra os incendios forestais en Galicia, así como do regulado pola Lei 2/2016, do 10 de febreiro, do solo de Galicia e o Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, teñen a obriga de mantelos nas mellores condicións de funcionalidade, seguridade, salubridade e limpeza co fin de evitar o risco de lumes.

Para garantir a execución das devanditas labores de conservación, o Concello procederá á súa execución forzosa -en caso de incumprimento por parte dos propietarios- mediante a imposición de multas de entre 1.000 e ata 10.000 euros de conformidade co establecido na normativa de aplicación.

Deste xeito ínstase á colaboración e solidariedade cidadá, para que a partir de agora tampouco descoiden a realización de labores de retirada de maleza que poida supoñer un perigo tanto para os bens materiais como para a veciñanza en xeral. Así mesmo, estímase necesario que os camiños estean limpos de vexetación, sendo necesario polo tanto que os/as propietarios/as dos terreos que estean fonte á vía pública procedan á limpeza dos mesmos; así como daquelas fincas que se atopen inmersas nos núcleos urbanos.

Os obxectivos de manter as propiedades libres de maleza son a prevención e defensa contra os incendios forestais en aras de evitar catástrofes coma a acaecida fai poucos días. Así como lograr o máis alto nivel de habitabilidade posible no termo municipal de Mos.

Neste sentido dende o Concello de Mos preténdese evitar que se repitan situacións coma as acontecidas o pasado mes, cando a localidade mosense sufriu un total de sete lumes localizados en Pantaño (San Gregorio) – Pombal – San Antoíño, parroquia de Louredo; Veigadaña, parroquia de Petelos; Camiño do Carballo Queimado, parroquia de Petelos; Puxeiros, parroquia de Tameiga (un lume iniciado nunha pequena zona de monte desencadeou, ao aproximarse ao polígono industrial, o incendio na nave de ‘Hierros y Metales Mos’); Cristo do Agro, parroquia de Pereiras; Herville, parroquia de Cela, e Torroso.

Estes incendios queimaron un total dunhas 300 hectáreas da localidade mosense. Cifras que poderían ter sido peores de non ser por todas as persoas que loitaron contra os lumes: veciños e veciñas anónimos e 33 efectivos que integraron o grupo de extinción de lumes creado para a ocasión.