Unha enxeñeira no alto dun aeroxenerador e outra traballando nunha canteira. Estas foron as dúas imaxes que o ano pasado gañaron a 1ª edición do concurso de fotografía MULLE.Rme, unha iniciativa da que agora se lanza a súa segunda edición e coa que a Escola de Enxeñaría de Minas e da Enerxía busca rachar cos estereotipos de xénero no mundo da enxeñaría. Aberto a toda a cidadanía e organizado ao abeiro da celebración do 8 de marzo, día internacional das mulleres, o obxectivo deste concurso é dar visibilidade a muller nas actividades relacionadas coa profesión de enxeñaría de minas e enerxía.
As persoas interesadas en participar poden enviar propostas ata o vindeiro 5 de marzo. O único requisito é que as imaxes sexan orixinais e que amosen situacións, paisaxes ou circunstancias relacionadas con actividades relacionadas coa profesión de enxeñeira de minas e enerxía: produción de enerxía, renovables, explotación de minerais e rochas, túneles, restauración de espazos mineiros, avaliación de impacto ambiental, fabricación de materiais… A muller debe ser a protagonista activa da imaxe ou, no caso contrario, a súa ausencia porá de manifesto a masculinización da actividade.
Cada participante poderá enviar un máximo de tres imaxes e admítense tanto obras en branco e negro como a cor realizadas mediante calquera técnica fotográfica. O xurado que elixirá a imaxe gañadora estará formado por unha ou un fotógrafo profesional, un membro do persoal docente de cada un dos graos da escola, un integrante do persoal de administración e servizos da Universidade e representantes do alumnado da escola (un por cada grao).
250 euros para a fotografía gañadora e 125 para o 2º premio
A persoa que gañe recibirá como premio un cheque por valor de 250 euros e a que acade o segundo posto entregaráselle un talón de 125 euros. A maiores está tamén previsto obsequiar cun pau de autofotos valorado en 30 euros a imaxe que obteña a cualificación de accésit. Ademais, as obras premiadas exporanse temporalmente, xunto con todas as demais presentadas, no vestíbulo da escola.
En 2019 presentáronse a este concurso unha vintena de imaxes, facéndose co primeiro premio unha fotografía de Ana García na que se vía a unha traballadora no alto dun aeroxerador, entre as palas do aparello e coa paisaxe de fondo, imaxe que agora ilustra o cartel desta segunda edición.
A inauguración da exposición coas fotografías participantes e a entrega de premios terá lugar o vindeiro 11 de marzo ás 13.00 horas no vestíbulo principal da escola.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.