Nigrán aposta pola creación dun novo equipo de fútbol senior ante a recente disolución do Nigrán

A “E.D. Val Miñor-Nigrán” asume co apoio do Concello a creación do seu primeiro equipo senior para dar cabida a xogadores da comarca ante a desaparición do Nigrán e a incertidume do Gondomar e Erizana.
Publicado por o día 07/07/2018 na sección de Deportes,Fútbol,Galicia,Nigrán

Nigrán aposta pola creación dun novo equipo de fútbol senior ante a recente disolución do Nigrán

O Concello de Nigrán aposta pola creación dun novo equipo de fútbol senior no municipio ante a recente disolución do Nigrán C.F e a proposta da E.D. Val Miñor-Nigrán por asumir ese baleiro.

Deste xeito, a “E.D. Val Miñor-Nigrán”, que ata agora compartía co Nigrán C.F. o campo municipal de Condomínguez e mantiña con este clube dende hai case unha década unha relación de filialidade, asume co apoio do Concello a creación do seu primeiro equipo senior para dar cabida a xogadores da comarca nun momento especialmente complexo da categoría, non só por esta desaparición, se non tamén pola incertidume do futuro do Gondomar e do Erizana.

“Coa disolución do Nigrán o municipio quedaba só co equipo senior do Racing Vilariño, así que dende o Concello non dubidamos en sumarnos e apoiar totalmente esta iniciativa que permite non mermar a oferta deportiva no municipio e, con elo, que os mozos que rematan a categoría xuvenil nos seus respectivos clubes teñan unha oportunidade máis de seguir”, sinala o alcalde, Juan González.

A E.D. Val Miñor-Nigrán creará unha comision xestora independente dentro da súa propia xunta directiva para este novo equipo senior, o primeiro co que contan nas súas filas. Así, o novo equipo arrancará a vindeira tempada en Condomínguez en Terceira Rexional e da man do adestrador Alejandro Alonso, ex-xogador do Nigrán e adestrador tamén do xuvenil B da E.D.Val Miñor, equipo co que ven de obter o ascenso a Liga Nacional. A plantilla, a piques de pecharse xa, estará composta por xogadores do desaparecido Nigrán e outros de toda a comarca. Os adestramentos arrancarán en agosto e será presentado públicamente ese mes no torneo Concello de Nigrán, clásico derbi organizado dende o consistorio e que ata agora desputaban o Nigrán C.F. e o Racing Vilariño.

O Nigrán C.F. xurdiu hai máis de 15 anos tras fusionarse o Dunas e o Priegue. Nos seus 12 primeiros anos ascendeu vertixinosamente de Terceira Rexional a Preferente e na derradeira tempada descenderon de Segunda a Terceira Rexional. Só conta contaba cun equipo de afeccionados senior tras acordar unha fusión en 2009 de tódalas categorías base coa E.D.Val Miñor.

Pola súa banda, ED Val Miñor-Nigrán naceu como tal en 2007 trala andaina dende 1996 do Ureca, actualmente é unha das escolas de fútbol máis importantes do Noroeste peninsular con 408 xogadores e 25 equipos federados, tendo pasado polas súas filas 3.000 xogadores, entre os que destacan algúns tan señeiros como os irmáns Alcántara ou Rodrigo Machado.