O arranxo dun camiño na Insua resolve os problemas de acceso a dúas vivendas

Pasou de contar cun firme de terra a dispor de superficie de formigón
Publicado por o día 22/05/2018 na sección de Galicia,Ponte Caldelas

O arranxo dun camiño na Insua resolve os problemas de acceso a dúas vivendas

Acceder a dúas vivendas na zona da Insua, na contorna máis próxima á Hípica Amazonas, é agora máis sinxelo. O Concello vén de rematar os traballos de acondicionamento dun camiño municipal que se atopaba en pésimas condicións.

O Goberno local (PSdeG-PSOE, AVP e BNG) vai atendendo, na medida das posibilidades as numerosas peticións de arranxo deste tipo de viais que recibe. Nesta ocasión a actuación permitiu acabar coas deficiencias dun acceso de terra, pavimentando con formigón un tramo de case 200 metros. Queda así resolta a comunicación coas dúas vivendas, así como con un alboio.

O camiño está situado nunha forte pendente, polo que as súas beiras quedaron tamén acondicionadas para canalizar as augas pluviais. O novo firme de formigón garante o agarre para a circulación rodada, especialmente no empalme coa pista principal, onde a pendente é elevada.