“O auto das ánimas” recibe a subvención ao talento do AGADIC

Publicado por o día 25/03/2020 na sección de Cultura

“O auto das ánimas” recibe a subvención ao talento do AGADIC

Este ano, o AGADIC acaba de subvencionar “O auto das ánimas”, unha longametraxe que desenvolve a súa ambientación no mundo dos augardenteiros itinerantes en Galicia. 

O AGADIC (Axencia galega das industrias culturais) subvenciona cada ano 3 longametraxes a novos realizadores galegos. Esta subvención ven axudando dende hai anos á produción de obras de especial interese cultural e con propostas novidosas e arriscadas, creando un ambiente idóneo para o desenvolvemento e potenciación do que internacionalmente se coñece como “Novo Cinema Galego”. Este ano o novo director é Pablo Lago Dantas, veciño de Redondela. O seu proxecto tamén foi galardoado co premio Antaviana a proxectos en desenvolvemento, concedido polo festival de cine L’Alternativa de Barcelona. 

“O auto das ánimas” é unha longametraxe de carácter documental producido por DianaToucedo films. O filme somérxenos no misticismo e a maxia do mundo dun dos últimos augardenteiros itinerantes que quedan en Galicia. Por medio de esta ambientación, o autor reflexiona sobre o choque xeracional que supón a forma de vida dos seus pais e avós con respecto á súa propia, intentando superar estas diferencias a través dunha aceptación da propia identidade cultural e espiritual. 

As localizacións principais da longametraxe, que actualmente se atopa na fase de post-produción,  son a ría de Vigo, a parroquia de Pontesampaio, a praia de Cesantes e os montes do Viso.

Con este proxecto, Pablo Lago Dantas estréase no campo da dirección, despois de desenvolver unha longa carreira en Barcelona como director de fotografía. 

Comentar noticia

Your email address will not be published.