O BNG apoia a demanda da CIG para modificar o sistema de gardas nos xulgados de Instrución de Vigo e Coruña e amplialas a 24 horas, en ambas cidades

Luís Bará apoia a reivindicación sindical reclamada pola sección Territorial de Xuíces e Xuízas para a democracia en Galiza e demanda un informe favorable do vicepresidente, Alfonso Rueda para ampliar a 24 horas as gardas dos xulgados de instrución en Vigo e Coruña
Publicado por o día 06/11/2019 na sección de A Coruña,BNG,Galicia,Política,Vigo

O BNG apoia a demanda da CIG para modificar o sistema de gardas nos xulgados de Instrución de Vigo e Coruña e amplialas a 24 horas, en ambas cidades

Nunha rolda de prensa conxunta co portavoz do Grupo Mixto-En Marea, Luís Villares, o portavoz de xustiza do BNG, Luís Bará apoiou a demanda da CIG para modificar o sistema de gardas nos Xulgados de Instrución nas cidades de Vigo e Coruña coa ampliación de 24 horas en ambas cidades.

Bará explicou que a Resolución do ano 2003 da Secretaria de Estado de Xustiza ditou instrucións sobre xornada e horarias no ámbito da Administración de Xustiza establecendo servizos de garda en partidos xudiciais con 8 ou máis xulgados de Instrución. Na actualidade, os servizos están cubertos con periodicidade semanal, en xornada partida de nove a catorce horas e os domingos e festivos cunha hora máis e en situación de localización para atender as incidencias que se poidan suscitar.

Bará considerou que o incremento de gardas de 24 horas supón “un servizo continuado para poder acudir aos xulgados a interpor unha denuncia, dar fluidez ao xulgado de garda e evitar detencións prolongadas”.

O BNG pide un informe favorable da Xunta para ampliar as gardas.

O deputado do BNG instou ao vicepresidente da Xunta, Alfonso Rueda a que emita, no prazo dun mes, “un informe favorable a esta modificación” e mostrou a súa sorpresa ante a resposta do Partido popular que afirmou descoñecer a demanda. “ Non sabemos, dixo, se esta resposta é para tapar a pasividade do Goberno galego” sobre todo, “despois de ser tramitada a demanda cos informes xurídicos correspondentes e apoiada por todas as organizacións sindicais”.

Bará anunciou que si Rueda non emite o informe, o BNG volverá a traer ao Parlamento esta demanda para seren debatida en comisión ou en pleno para “forzar ao goberno a apoiar a medida”.

O portavoz de Xustiza do BNG reiterou que todas todos os partidos xudiciais con 8 ou 9 xulgados de Instrución prestan 24 horas de garda diaria, agás Coruña e Vigo e dende o 18 de marzo deste ano e coa incorporación de partido xudicial de Córdoba ao sistema , as dúas cidades galegas son as únicas con oito xulgados de instrución e gardas semanais, o que a seu xuízo representa “unha discriminación”.

Segundo o Consello Xeral do Poder Xudicial , recalcou Bará, o trámite para modificar o sistema de gardas “só está pendente da emisión de informes do Ministerio de Xustiza e da Xunta”. O nacionalista volveu a reclamar o informe do Goberno galego para avanzar nunha demanda que busca “mellorar o servizo e reverte nunha maior calidade da xustiza”.

O portavoz de Xustiza do BNG, Luís Bará e o portavoz do Grupo Mixto, Luís Villares compareceron ante os medios de comunicación acompañados por representantes da CIG Xustiza.