O BNG denuncia que os datos de que dispón a CE sobre a superficie de eucaliptos en Galiza son falsos

A eurodeputada Ana Miranda pide que se investigue o modelo forestal galego
Por o 17/03/2019 | Sección: BNG,Política
O BNG denuncia que os datos de que dispón a CE sobre a superficie de eucaliptos en Galiza son falsos

A eurodeputada Ana Miranda, e o deputado MIni Rivas, denunciaron que o goberno galego ten trasladado datos erróneos á Comisión Europea sobre a superficie de eucaliptos que existe en Galiza. Así se desprende da resposta ofrecida esta semana polo comisario de Medio Ambiente, Karmenu Vellu, á pregunta presentada por Miranda sobre o aumento do cultivo de especies invasoras pirófilas.

No documento remitido, a Comisión recoñece ser consciente do uso de especies de eucalipto na silvicultura galega; porén asegura que o programa de desenvolvemento rural actual “exclúe o aumento da superficie forestal con esta especie” e que o Regulamento (UE) n.º 1143/2014 “estabelece un marco para previr a introdución e propagación de especies exóticas invasoras”.

“A resposta do Comisario confirma que dispón de datos falsos sobre eucaliptos, e isto é un escándalo”, subliña a eurodeputada nacionalista, xa que os expertos explican que a superficie de cultivo incrementouse máis do dobre. Precisamente a nova planificación forestal para Galiza, da que está a punto de aprobarse o novo Plan Forestal, vén a regularizar e da por boas máis de 250.000 mil hectáreas de eucalipto aumentadas fóra de planificación dende que no ano 1992 sen aprobara o Plan en vixencia, e que agora inclúe a previsión de aumentar noutras 25.000 ha. De este xeito, a realidade é que Galiza nestes momentos conta cunhas 500.000 mil ha. segundo os datos oficiais, que algúns expertos elevan ás 600.000.

Tendo en conta estes datos, que indican un aumento do 105% sobre o planificado e amosan o fracaso de execución do Plan Forestal galego vixente (período 1992-2032), Ana Miranda pide que se investigue o modelo forestal galego e que a Comisión emprace á Xunta a paralizar a aprobación inminente do novo Plan Forestal e anuncia que solicitará unha reunión urxente co comisario para trasladarlle esta contradición entre os datos reais de Galiza e os que manexa a Comisión.

Multifuncionalidade do bosque

Outro aspecto fundamental da resposta da Comisión refírese a que considera a multifuncionalidade dos bosques como “un principio clave consagrado na estratexia da UE en favor dos bosques e o sector forestal” e varias directrices subliñan “a importancia de utilizar especies arbóreas autóctonas para a repoboación e a rexeneración forestais”.

Porén o Bloque considera que o novo Plan afástase das políticas de fomento da multifuncionalidade que defende a Comisión, desde o momento en que recolle un marcado interese por plantar as 25.000 novas ha. de eucalipto nos primeiros anos de aplicación do plan, dándolle máis importancia a este cultivo que a outras especies como o castiñeiro. Neste caso prevese tamén a plantación dunhas 25.000 ha. pero coa diferenza de que a súa plantación repartirase durante os 20 anos de aplicación.

“O Plan forestal en Galiza está paralizado desde hai tempo e os únicos datos fiables son de 1992, o cal é unha barbaridade”, destaca Mini Rivas, quen denuncia que o eucalipto “está acurralando a economía deste país”. Neste sentido indica que xa van 3.000 aserradoiros eliminados desde que o eucalipto se planta como monoespecie. “A biodiversidade deste país está cargada e vai ser moi difícil recuperala”, engadiu. Para conseguilo habería que facer unha planificación “que non siga os intereses das grandes multinacionais e clúster da madeira”.

Incendios

No tocante á vaga de lumes, o Bloque salienta que hai unhas causas estruturais que favorecen a vaga de lumes e hai unha situación das condicións do clima que xa están a agudizar este tipo risco, polo que considera inadmisible que se neguen realidades forestais cunha relación de causalidade con estes devastadores episodios. Ao respecto a Comisión lembra que o programa de desenvolvemento rural 2014-2020 de Galiza “inclúe un compoñente de apoio ás operacións de fomento da xestión forestal sostible, outro de prevención de incendios forestais cunha dotación de 120 millóns de euros e outro para restauración dotado con 12 millóns.

“Se a Comisión está recibindo datos falsos por parte do goberno galego nos que non se incide en que houbo mortes e superficies arrasadas, estamos diante dun escándalo institucional que significaría ter que ir ao Tribunal de Contas Europeo”, manifestou Ana Miranda. “Se o orzamentos dos fondos estruturais contempla a prevención de incendios e que non se aumente a superficie de eucaliptos e se está aumentando, temos un problema de engano institucional”, engadiu.

Neste sentido Mini Rivas apuntou que precisamente a Consellería de Medio Ambiente destina a metade do seu orzamento para prevención de incendios, o cal “é unha barbaridade”. Segundo explicou o deputado a existencia de masas inxentes de eucaliptos “o único que fai é propagarse sen límite”, en referencia aos lumes do 2017.

Comentar noticia

Your email address will not be published.