O Club Baloncesto Seis do Nadal – Coia organizou por segunda tempada consecutiva, e durante o presente mes de agosto, o seu Ciclo de Formación Interna para Adestradores/as. Cun total de 30 participantes, entre os que se atopan adestradores/as de iniciación e xogadores/as que buscan comezar o seu camiño como adestradores/as, o club vigués forma aos seus futuros técnicos.

Sergio González, Director Deportivo e adestrador da entidade, é o responsable desta iniciativa que ten como eixo central a “Planificación e Metodoloxía do Adestramento”. A través dunha serie de sesións teóricas e prácticas, sumando doce horas de formación presencial, tódolos participantes tiveron un primeiro achegamento á realidade dun adestrador de baloncesto de formación.

O próximo martes a entidade levará a cabo a última sesión do seu segundo Ciclo de Formación, iniciativa que xa está consolidada como unha actividade imprescindible durante o calendario de verán e que para as próximas tempadas o Club Baloncesto Seis do Nadal – Coia pretende extender aos demais clubs da cidade.