O coidado do medio ambiente representado a través das artes, na nova proposta de teatro para escolares de Afundación

O Auditorio do Teatro Afundación de Vigo acollerá as representacións de Gaia do 13 ao 19 de novembro con dúas funcións diarias, ás 10.00 e ás 12.00 h
Publicado por o día 12/11/2019 na sección de Cultura,Eventos,Galicia,Vigo

O coidado do medio ambiente representado a través das artes, na nova proposta de teatro para escolares de Afundación

Afundación, a Obra Social de ABANCA, continúa coa programación de representacións teatrais para escolares con Gaia, unha proposta coa danza como protagonista na que a pintura, a música e o audiovisual fusiónanse para enviar unha mensaxe de concienciación sobre o coidado do medio ambiente. As representacións serán do 13 ao 19 de novembro no Auditorio do Teatro Afundación de Vigo con dúas funcións diarias, ás 10.00 e ás 12.00 h.

Máis de 4100 alumnas e alumnos de 70 centros escolares de Vigo e arredores acudirán a ver esta obra na que a intensidade, o poder e a beleza das características do noso planeta e dos seus tesouros naturais, así como a interacción entre as persoas e a natureza serán a clave. Ao final da representación haberá unha pequena charla co público infantil.

EDUCACIÓN EN VALORES

Esta actividade enmárcase dentro do proxecto global de educación en valores de Afundación. Partindo da importancia da escola como centro de aprendizaxe, as propostas da Obra Social de ABANCA pretenden complementar o ensino académico, especialmente a instrución, presentando uns espazos e unhas actividades que conxuguen o lúdico e o formativo co fortalecemento de valores esenciais para unha sociedade cohesionada. Deste xeito, a entidade está comprometida coa tolerancia, co respecto, coa solidariedade e, por suposto, coa adquisición por parte de cada estudante das ferramentas necesarias para perseverar na consecución da súa autonomía persoal.

A propostas da Área Educativa de Afundación, nas que participan anualmente máis de 136.000 escolares, abarcan múltiples disciplinas e fomentan o desenvolvemento de competencias transversais. Así, o seu programa inclúe actividades culturais en artes escénicas e plásticas e de fomento da lectura; actividades interxeracionais que reforzan o respecto e o intercambio de coñecementos entre mocidade e xente maior; actividades de educación ambiental para abordar a importancia do respecto polo medio; actividades de novas tecnoloxías, necesarias para o emprego das ferramentas imprescindibles nunha contorna que innova de maneira permanente; e actividades de cociña que ensinan os beneficios dunha alimentación saudable.

Comentar noticia

Your email address will not be published.