O Concello de Mos préstalles aos seus taxistas un servizo gratuíto de desinfección diaria de vehículos

É realizado ao final de cada xornada por persoal e na base de Emerxecias. Utilízanse para a limpeza hipoclorito rebaixado con auga, productos desinfectantes de superficies e tratamento especial de tapicerías; así como ionización con ozono
Publicado por o día 02/05/2020 na sección de Coronavirus,Galicia,Mos

O Concello de Mos préstalles aos seus taxistas un servizo gratuíto de desinfección diaria de vehículos

A alcaldesa de Mos, Nidia Arévalo, e o concelleiro mosense de Medio Ambiente Sostible e responsable do Servizo Municipal de Emerxencias, Leo Costas, anunciaron hoxe “un paso máis do noso Servizo de Emerxencias nesta crise sanitaria do COVID-19, que comezou a realizar tarefas diarias de desinfección gratuíta dos taxis de Mos ao remate de cada xornada laboral na base de Emerxencias e Protección Civil do Concello de Mos, sita na Veigadaña”.

Os labores de limpeza e desinfección dos taxis mosenses realízanse con hipoclorito rebaixado con auga, productos desinfectantes de superficies  e tratamento especial de tapicerías. A desinfección de cada vehículo compleméntase e complétase coa ionización mediante cañóns de ozono.

As desinfeccións practícanse tanto nos taxis tamaño turismo como nos grandes de sete prazas adaptados. Na limpeza de cada vehículo invístese aproximadamente unha hora e dada a especificidade dos tratamentos aplicados, os productos e maquinaria de desinfección e o tempo investido, estímase un custe mínimo da devandita limpeza por vehículo duns 40 euros.

Neste senso o edil Leo Costas declaraba hoxe que “desde o Concello de Mos e desde o equipo de goberno local mosense sentímonos moi orgullosos do noso Servizo Municipal de Emerxencias e do incrible labor que está a desenvolver durante a presente crise sanitaria do COVID-19, e de unha vez máis ser pioneiros, neste caso co servizo gratuíto de desinfección de vehículos para os taxistas de Mos, un dos colectivos dos sectores empresariais que máis están a sufrir económicamente esta crise. Por iso puxémonos ao seu servizo para apoialos e prestarlles a nosa colaboración no que, como administración local, está na nosa man e ao noso alcance”.

Pola súa banda Arévalo, rexedora local mosense, explicou que “desde o Concello de Mos non baixaremos a garda mentres dure esta crise e seguiremos a ser proactivos na posta en marcha de iniciativas novidosas e pioneiras pero, sobre todo, que sexan de axuda ás persoas e colectivos mosenses que máis o precisen durante estes momentos tan complicados. O noso obxectivo é tenderlle a man en todo o que poidamos aos enfermos, ás familias, ao pequeno comercio, ás empresas, aos autónomos,  en definitiva, a todos os que estean a sufrir a crise persoal, sanitaria e/ou económicamente. Así o fixemos desde o principio e así continuaremos a facelo mentres esta situación continúe”. Concluiu a alcaldesa.

Comentar noticia

Your email address will not be published.