O Concello de Mos puxo en marcha en xuño un procedemento administrativo mediante Comisión de Deslinde para aclarar os límites xeográficos con Vigo no Polígono do Rebullón

O alcalde da cidade olívica minte falando de anexión, usurpación e ilegalidade nun acto que a rexedora local mosense, Nidia Arévalo, considera gravísimo
Publicado por o día 12/12/2018 na sección de Galicia,Mos

O Concello de Mos puxo en marcha en xuño un procedemento administrativo mediante Comisión de Deslinde para aclarar os límites xeográficos con Vigo no Polígono do Rebullón

En resposta ás declaracións do alcalde de Vigo, Abel Caballero, o Concello de Mos, representado pola súa alcaldesa, Nidia Arévalo, expón que:

En primeiro lugar o Concello de Mos non se anexiona nada, simplemente convoca unha comisión de deslinde para dirimir a pertenza de 55.000 metros cadrados (que non 50.000) do Polígono Industrial do Rebullón que históricamente, dende o ano 1890, se consideran de Mos pero que o Instituto Geográfico Nacional, IGN, establece como Vigo en 2007 ante a desaparición dun marco.

En segundo lugar non existe ningunha “manifiesta ilegalidad” como di Caballero, tan só existe por parte do Concello de Mos a vontade de emprender un trámite administrativo (que non un litixio, aínda que visto a actitude do alcalde de Vigo probablemente chegará a selo) para deslindar a zona obxecto de estudo.

O Concello de Mos notificoulle o pasado xullo ao de Vigo (non o acaba de facer agora como di Abel Caballero) a constitución en Pleno e membros integrantes da Comisión de Deslinde mosense (adxúntase acordo plenario do mes de xuño) para que o Concello de Vigo realizase o mesmo trámite e poder convocar a primeira xuntanza in situ de ambas partes e iniciar o proceso de deslinde. A resposta do Concello de Vigo nunca se produciu e hoxe, cinco meses despois, o seu alcalde invéntase que o de Mos anexionouse a superficie obxecto de debate.

Mos remitiulle tamén en xullo a Vigo o informe pericial que xustifica o inicio do expediente de deslinde (adxúntase oficio de remisión) e que argumenta técnicamente a corrección dos lindes datados de 1890 e o erro da liña marcada en 2007 polo IGN ao obviar un marco (adxúntase copia das conclusións do informe pericial).

O Concello de Mos rexiuse pola liña de deslinde con Vigo establecida polo IGN para que a Xunta de Galicia autorizase aprobar o Plan Xeral de Ordenación Municipal, pero ante a demanda dun empresario do Polígono do Rebullón que co novo Plan Xeral de Mos queda fóra do termo municipal mosense e pasa a pertencer a Vigo, -pero que quere seguir pertencendo a Mos-, a administración local mosense inicia o trámite administrativo de deslinde necesario para que no PXOM prevaleza o límite histórico de 1890 con Vigo e non o do IGN.

Dende sempre o Concello de Mos cobra o IBI das naves situadas na zona obxecto de deslinde do Polígono do Rebullón porque lles ofrece servizos públicos, que nunca correron a cargo do Concello de Vigo nin nunca o Concello de Vigo se interesou en asumir ditos servizos. Así como nunca se preocupou de reclamarlle a Mos eses ingresos do IBI, nin tomou a iniciativa de convocar unha Comisión de Deslinde para aclarar a verdadeira ubicación das mesmas.

Por todo elo a rexedora local mosense, Nidia Arévalo, lamenta que “o alcalde de Vigo se dedique a mentir sobre o Concello de Mos nunha pataleta política motivada pola súa incapacidade e nefasta xestión noutras cuestións”.

“Eu actúo segundo as obrigas do meu cargo e busco solucións de inmediato ante unha liña de deslinde que marca o IGN e coa que Mos non está dacordo, se Caballero fixese o mesmo en vez de adicarse ó populismo, este tema estaría solucionado fai anos, ou agora estaríamos ambos concellos traballando conxuntamente para solucionalo”.

Arévalo remata aclarando que “ninguén se está intentando apropiar de nada porque eses terreos aparecen como Vigo no Plan Xeral e agora o que pretendemos é esclarecer se efectivamente son de Vigo, como marca o IGN, ou de Mos, como está demostrado históricamente, para eso se convoca a Comisión de Deslinde, nada máis. Non hai ningunha anexión, nin apropiación, nin moito menos ilegalidade; todo o contrario: o que hai é vontade de esclarecer mediante un trámite admistrativo totalmente legal”.

“Apelo á seriedade, non se pode mentir dese xeito sobre un Concello veciño, é algo gravísimo”, concluiu á alcaldesa de Mos.

(Nos documentos adxuntos inclúense tamén planos que indican a liña de deslinde do Concello de Mos con Vigo segundo o IGN que é a que se contempla no PXOM mosense (de cor vermella no plano) e a liña do límite entre ambos concellos segundo as normas subsidiarias de 1992 que fan referencia ao deslinde histórico de 1890 (de cor azul no plano)).

Comentar noticia

Your email address will not be published.