O Concello de Nigrán entregará nos vindeiros días a Patrimonio o documento de aprobación inicial do PXOM co catálogo de bens actualizado

O novo equipo redactor mantivo esta mañá un encontro con tódolos portavoces para informarlles dos avances na tramitación, calculando que esté listo para Aprobación Provisional no primeiro semestre de 2019
Publicado por o día 10/08/2018 na sección de Galicia,Nigrán

O Concello de Nigrán entregará nos vindeiros  días a Patrimonio o documento de aprobación inicial  do PXOM co catálogo de bens actualizado

Os interesados poden consultar dende o mes de abril en Urbanismo o estado actual das súas alegacións. O goberno manterá encontros durante os vindeiros meses con veciños e portavoces políticos para analizar o documento  polo miúdo

 

Nigrán, 09/08/2018.- O equipo redactor do PXOM de Nigrán mantivo esta mañá un encontro co goberno local e os diferentes portavoces da corporación co obxectivo de informarlles do estado actual do documento, tal e como lle solicitara o propio alcalde, Juan González. A empresa liderada por Alfonso Botana retomou os traballos no Plan despois de que no pleno extraordinario de maio se aprobase a cesión do contrato de Eptisa, asunto que se verá refrendado oficialmente nos vindeiros días e que permitirá que paralelamente se envíe a Patrimonio o documento de aprobación inicial co catálogo de bens totalmente actualizado (o informe desfavorable da Dirección Xeral indicaba a necesidade de revisar tódolos bens documentados). Deste xeito, o estudo de prospección arqueolóxica levado a cabo por ‘Desenrolo e Obras de Arqueoloxía S.C.’ e o da propia empresa redactora elevan de 235 a 597 os elementos catalogados (pezas de interese arqueolóxico ou arquitectónico e etnográfico), destacando a protección do Camiño Portugués pola costa ou os hórreos, antes prácticamente sen incluír no documento.

“Grazas a cesión podemos seguir adiante co PXOM, cuxa aprobación é unha prioridade para este goberno”, indica González.

Segundo explicou o propio Alfonso Botana aos portavoces, o novo documento será enviado na vindeira semana a Patrimonio, onde dispoñen dun prazo máximo de 3 meses para informar (pasado este tempo sen obter contestación se entende que a resolución é favorable). “Eses meses de impass serán os que aproveitemos para informar polo miúdo aos veciños do documento e introducir melloras”, explica o alcalde, Juan González, quen recorda que as contestacións provisionais ás alegacións están a disposición dos veciños dende o mes de abril no departamento de Urbanismo. “Buscamos a máxima transparencia e consenso para acadar o obxectivo final, que non é outro que aprobar un PXOM no que todos os actores estemos de acordo que é o mellor documento posible”, sinala.

Unha vez obtida a resposta de Patrimonio o documento será enviado a Medio Ambiente, Dirección Xeral de Costas, Axencia Galega de Infraestruturas, Augas de Galicia e Portos do Estado. “A previsión é ter tódolos informes favorables en decembro e que xa no primeiro semestre de 2019 se poida presentar o documento á Aprobación Provisional do Pleno”, resume Botana.