O Concello de O Porriño ten unha xuntanza coa Zona Franca para ampliacións industriais

Por o 30/01/2019 | Sección: Galicia,O Porriño
O Concello de O Porriño ten unha xuntanza coa Zona Franca para ampliacións industriais
Xuntanza de Concello e Zona Franca para tratar da ampliación de superficies industriais, o espazo para a gardería na Granxa e a radicación da Aula da UNED no Porriño, no CIE, propiedade do Consorcio

Este mércores a alcaldesa do Porriño, Eva García de la Torre, e o concelleiro de Urbanismo, Marcelino Coto, mantiveron unha xuntanza coa directora de Promoción Económica da Zona Franca de Vigo, Rosa Eguizábal, e técnicos do Concello e da propia Zona Franca, para analizar as posibilidades de ampliación de espazos industriais no Concello do Porriño, un proxecto no que o delegado do Consorcio, David Regades, amosou moito interese, tanto en visitas a O Porriño coma en xuntanzas coa alcaldesa e con representantes empresariais.

Gardería Infantil
Ademais, nesta reunión, estudáronse, máis polo miúdo, en primeiro lugar, a localización da “tan agardada” gardería infantil, no Polígono de A Granxa, nun espazo que este mesmo xoves visitarán representantes do Concello e do Consorcio.

A gardería, lembra Eva García de la Torre, “é unha dotación longamente demandada por empresas e traballadores e podería radicarse nunha construción xa existente no propio polígono”, como considerarán os especialistas de as dúas administracións.

Aula da UNED do Porriño
Así mesmo, subliña, a alcaldesa,“tamén tratamos da ubicación da Aula da Universidade de Educación a Distancia (UNED) do Porriño” no mesmo polígono, un proxecto, subliñou, que tanto o Concello coma Zona Franca “consideramos que é especialmente importante e beneficioso ”.

García de la Torre indicou que o Centro de Iniciativa Empresarial (CIE), “que tamén visitaremos este xoves”, propiedade do Consorcio, “conta xa con espazos, dotacións, e infraestruturas” que poderían aloxar as “clases, biblioteca e salón de actos” da Aula da UNED sen que supoña un desembolso inicial moi elevado para o Concello do Porriño.

 

Comentar noticia

Your email address will not be published.