O Concello de Oia reparte 50 novos composteiros domésticos

As solicitudes poderán presentarse no Concello ata o día 31 de agosto
Publicado por o día 24/07/2019 na sección de Galicia,Oia

O Concello de Oia reparte 50 novos composteiros domésticos

O Concello de Oia continúa coa súa campaña de compostaxe doméstica distribuíndo, de xeito gratuíto, 50 novos composteiros individuais entre as persoas que o soliciten. As solicitudes poderán presentarse no Concello ata o día 31 de agosto.

Esta nova partida de composteiros provén dunha achega da Deputación de Pontevedra a través do Plan Revitaliza (20 unidades) e doutra de Sogama (30 unidades) a través do programa de compostaxe doméstica.

O Concello de Oia anima á veciñanza a empregar estes dispositivos nos seus fogares e lembra que a compostaxe é unha oportunidade para reciclar os residuos orgánicos: o compost que se fabrica (rico en materia orgánica e minerais) pode ser reutilizado nas hortas domésticas por ser un bo fertilizante para o solo.

Beneficios da compostaxe

O compost é un excelente abono para as hortas domésticas, pois contribúe a que as plantas teñan maior resistencia ás pragas e enfermidades sen necesidade de empregar fertilizantes artificiais e pesticidas. Así mesmo, este produto natural é beneficioso para a estrutura e a saúde do solo.

Ademais, o compost axuda a diminuír a produción de residuos, pois a materia orgánica é reutilizada en vez de ser botada aos contedores de lixo.

Comentar noticia

Your email address will not be published.