O Concello de Ponte Caldelas suspende a actividade de Musicoterapia en Anceu en sinal de loito pola morte dun veciño en Brasil

Consternación pola morte de Marcio Pérez Santana, que foi abatido pola Policía nun control cheo de irregularidades
Publicado por o día 21/09/2018 na sección de Galicia,Ponte Caldelas

O Concello de Ponte Caldelas suspende a actividade de Musicoterapia en Anceu en sinal de loito pola morte dun veciño en Brasil

O Concello de Ponte Caldelas decidiu suspender o inicio dun ciclo de Musicoterapia, unha actividade  lúdica que ía comezar este venres na parroquia de Anceu, tras coñecer a morte, en estrañas circunstancias de Marcio Pérez Santana, de 41 anos, en Salvador de Bahía (Brasil).

A nova, que foi comunicada hoxe á familia, causou unha profunda consternación en Ponte Caldelas, e moi especialmente na parroquia de Anceu, onde residen os pais de Marcio. A súa nai partiu para o Brasil para facerse cargo do corpo.

O suceso produciuse á noite de onte (hora brasileira), cando Marcio, que tiña unha empresa construtora, e a súa parella estaban a piques de entrar no garaxe da súa residencia. Ao parecer pasaron un control policial que non estaba correctamente sinalizado. Segundo algunhas versións mesmo confundiu aos axentes cun grupo de asaltantes. A Policía abriu fogo e unha bala alcanzou a Marcio na caluga. As autoridades xa iniciaron unha investigación diante das acusacións de graves irregularidades achegadas por diversas testemuñas.

O Goberno local (PSdeG-PSOE, AVP e BNG) expresa as súas condolencias á familia e aos amigos e coñecidos de Marcio, que viña habitualmente a Ponte Caldelas a pasar as súas vacacións. O alcalde, Andrés Díaz, natural de Anceu expresou tamén o seu pésame persoalmente á familia e púxose ao seu dispor para o que sexa preciso.