O Concello do Grove pon en marcha formación online en psicoeducación dirixida a mulleres

O prazo de inscrición remata o luns 17 de agosto.
Publicado por o día 14/08/2020 na sección de Galicia,O Grove

O Concello do Grove pon en marcha formación online en psicoeducación dirixida a mulleres

O Grove, 14 de agosto de 2020. O Concello do Grove porá en marcha a través do Centro de Información ás Mulleres (CIM) un programa de psicoeducación que se realizará a distancia como alternativa á imposibilidade de realizar os habituais obradoiros presencias por mor da situación causada pola Covid-19. Neste caso ofértanse trinta prazas para o programa “O Faro. Guía para trazar un plan de vida”, que será impartido pola escritora, psicóloga, adestradora e feminista María Fornet.

O obxectivo do curso é que as mulleres comprendan a influencia do contexto e da socialización de xénero e como se poden crear posibilidades e vías de desenvolvemento a partir dese punto. Traballarase na vontade individual e en como esta contribúe á consecución de logros, deseñando unha estratexia de vida flexible que contribúa a conseguir a felicidade como mulleres comprometidas co seu desenvolvemento persoal e coa súa evolución vital.

O curso está deseñando seguindo un guión de 200 páxinas presentado como unha auto-viaxe na que, sesión a sesión, as mulleres participantes vaian avanzando páxina a páxina, exercicio a exercicio, de cara a unha vida máis plena e, sobre todo, con menos sufrimento. Unha vez completado o curso, disporase dun plan de vida profesional e persoal, creado de xeito minucioso que achegue unha dirección e a tranquilidade de saber cara a onde se camiña.

Dende o punto de vista metodolóxico, este curso está baseado nos enfoques da psicoloxía de terceira xeración, ademais de na disciplina do Coaching Psychology. Tamén se aplicarán notas da psicoloxía narrativa e, de xeito transversal, un enfoque de xénero. As alumnas contarán cun material moi coidado sobre o que traballar e poderán participar en dúas charlas a través dunha plataforma en liña, contando ademais cunha formadora que atenderá as dúbidas. As persoas que non teñan acceso ás TIC contarán con soporte en espazos municipais.

O programa está especialmente destinado a persoas en situación de desemprego, que sufran ou sufriran algún tipo de violencia, persoas con dúbidas en canto ao enfoque do seu desenvolvemento vital ou profesional, aquelas que acaben de pasar por un cambio importante (coma unha separación ou divorcio, a enfermidade propia ou dalgunha persoa próxima, unha situación de dó ou loito etc.), que procedan doutros países e non conseguiran a integración ou mulleres que, simplemente, se sintan atascadas na súa vida.

Esta formación está financiada pola Secretaria Xeral de Igualdade e cofinanciada polo Fondo Social Europe (FSE) con cargo ao programa operativo FSE Galicia 2014-2020 e polo Pacto de Estado contra a violencia de xénero, a través da liña de promoción da igualdade entre mulleres e homes e de prevención e tratamento da violencia de xénero. Cada muller poderá adaptar o programa ao seu ritmo e horario, mais a finalización está prevista o 30 de setembro. Lembramos que para inscribirse tan só é preciso poñerse en contacto co CIM.

Comentar noticia

Your email address will not be published.