O EXP-UVigo presenta a súa candidatura a repetir título dobregando ao líder

O equipo universitario sitúase en terceiro lugar a punto e medio do primeiro clasificado
Por o 14/03/2018 | Sección: Universidade de Vigo
O EXP-UVigo presenta a súa candidatura a repetir título dobregando ao líder

Tras un inicio dubitativo, o Escola de Xadrez Pontevedra-Universidade de Vigo-Estratexia pola Paz continúa a dar mostras de porque é o vixente campión galego. Despois de encadear dous trunfos consecutivos, o equipo universitario sumou esta fin de semana un valioso triunfo na súa loita por escalar posicións na táboa clasificatoria. Cun claro 1,5-4,5, o EXP-UVigo superaba na súa casa ao ata entón líder da competición autonómica, o Xadrez Ourense, o que permite ao equipo pontevedrés afianzarse no terceiro posto da clasificación, a só medio punto dos ourensáns e 1,5 puntos do novo líder da categoría, o equipo da USC.

Tres vitorias e tres empates

O conxunto universitario chegaba a esta sexta xornada da competición autonómica con 3,5 puntos de desvantaxe respecto dos ourensáns, que concorreron a este enfrontamento sen o seu número un e vixente campión de España, o Gran Mestre Iván Salgado. Aínda así, o equipo local concorreu a esta rolda cos seus mellores xadrecistas, como amosou a igualdade vivida nos dous primeiros taboleiros. Neles, Alberto Portela e Miguel Senlle non puideron pasar das táboas fronte aos mestres portugueses Jorge Viterbo e André Sousa.

No terceiro, o capitán do EXP-UVigo, Pablo García, soubo reporse dunha inferioridade inicial e saír vitorioso nun complexo final de partida, mentres que Daniel Rivera sumaba o terceiro empate da xornada no cuarto taboleiro. Foi no quinto e sexto nos que chegaron as novas alegrías para o equipo visitante. Por unha banda, Víctor Miguel foi quen de aproveitar un erro da súa rival, a ex-campioa de España absoluta Yudania Hernández, para sumar un novo punto para o equipo universitario, ao que houbo que engadir o logrado, no seu debut co primeiro equipo Francisco Veiga. Con só 14 anos, este xadrecista, que se incorporou este ano ao equipo tras participar no Campus Internacional Ramón Escudeiro Tilve, ostenta actualmente o número 1 sub 16 de Portugal e número 33 do mundo entre os e as xadrecistas nacidos en 2003 e acaba de lograr a súa primeira norma de Mestre Internacional no Aberto de Sevilla.

O vindeiro sábado 17 de marzo, o equipo pontevedrés tentará continuar nesta boa liña no encontro que os medirá, na Casa da Luz, ao Círculo Chantadino de Xadrez

Noticias de última hora en Vigo

Comentar noticia

Your email address will not be published.