O Goberno municipal de Barro visita as obras de mellora e pavimentación realizadas nas parroquias de Valiñas e a Portela

Publicado por o día 05/08/2020 na sección de Barro,Galicia

O Goberno municipal de Barro visita as obras de mellora e pavimentación realizadas nas parroquias de Valiñas e a Portela

O Goberno municipal visitou as obras de mellora e pavimentación realizadas en distintos viais nas parroquias de Valiñas e da Portela. Estas actuacións consistiron na ampliación da capa de rodadura, na reparación do pavimento en zonas deterioradas e na construción, nalgúns tramos, de cunetas de formigón.

Para Xosé Manuel Fdz. Abraldes, Alcalde de Barro, estas “son actuacións moi necesarias porque melloran a seguridade viaria ao renovar a capa de rodadura e eliminar algún punto conflitivo para a circuación, ao mesmo tempo que melloran o acceso a eses núcleos de poboación, ofrecendo un mellor servizo a toda a veciñanza”.

As obras realizadas en Valiñas consistiron na mellora do acceso ao lugar de Piñeiro e foron realizadas pola empresa COVSA. Contaron cun orzamento de 39.010,84 euros financiado con cargo ao Plan Concellos 2020 da Deputación de Pontevedra. Así mesmo, as actuacións de pavimentación levadas a cabo na Portela realizáronse en varios viais da parroquia: desde O Caeiro até a Cancela; desde A Cancela até o Lombo da Maceira e no vial paralelo ao viaduto do tren. Contaron cun orzamento de 48.352,76 euros financiado con cargo ao Plan Concellos 2020 da Deputación de Pontevedra e foron executadas pola empresa COVSA.