Publicado por 
A Asociación Viguesa de Esclerose Múltiple (Avempo) organiza este martes xunto a Vitrasa unha ruta especial do ‘Nadalbus’, que percorre as rúas viguesas mostrando a iluminación do Nadal. Con motivo do Día Nacional da Esclerose Múltiple (EM), o autobús transformarase durante unha hora no ‘ EMbus’, co fin de visibilizar a enfermidade e apoiar ás persoas afectadas pola mesma.
Durante o itinerario, os usuarios de Avempo poñerán de manifesto unha reclamación do colectivo: o recoñecemento do 33% de discapacidade automaticamente co diagnóstico, que blindaría unha protección social a todas as persoas afectadas.
O ‘EMbus’ partirá ás 17:30 horas da sede de Avempo e durante unha hora percorrerá a cidade para que os usuarios poidan gozar de preto os principais atractivos da iluminación #do Nadal vigués. Desde a asociación celebran a iniciativa e agradecen o apoio de Vitrasa, que permitirá que os seus usuarios poidan gozar da experiencia sen os inconvenientes das aglomeracións, incompatibles cos casos de mobilidade reducida dalgúns afectados de EM.
Ademais, Avempo e Vigo únense á iniciativa, proposta pola Federación Galega de Esclerose Múltiple (FEGADEM), de iluminar de cor vermella edificios públicos ou monumentos das diferentes cidades galegas para poñer o foco de atención sobre a Esclerose Múltiple. No caso de Vigo iluminaranse de vermello as fontes da rúa Aragón.
Recoñecemento do 33% de discapacidade
Con motivo do Día Nacional da Esclerose Múltiple, Avempo únese á reclamación do resto de entidades de persoas afectadas de Esclerose Múltiple en España, que pasa por esixir o recoñecemento do 33% de discapacidade directamente co diagnóstico, necesario para poder acceder a calquera medida de protección social que facilite un mellor acceso ao emprego, mantemento do posto de traballo, apoio en estudos e formación ou obtención de axudas para realizar adaptacións no fogar.
Nos últimos anos, Avempo viu como moitas das solicitudes do recoñecemento do 33% de discapacidade non resultaron favorables ao non terse en conta os síntomas invisibles que comporta a coñecida como ‘enfermidade das mil caras’, que teñen un gran impacto na calidade de vida das persoas afectadas: trastornos motores, problemas cognitivos, de agudeza visual, fatiga, aspectos emocionais e psicolóxicos como ansiedade e depresión…
Por iso, desde a asociación reclaman que o diagnóstico dunha enfermidade neurodegenerativa como é a Esclerose Múltiple comporte o recoñecemento automático do grao mínimo do 33% de discapacidade, sen ter que pasar por todo o proceso burocrático que resulta longo e tedioso aos nosos usuarios, que non sempre ven recoñecida esa discapacidade.
Esta reivindicación enmárcase no conxunto das tres medidas que desde o ano 2011 tanto o Congreso dos Deputados como numerosos parlamentos autonómicos veñen reclamando ao Goberno, sempre con unanimidade de todos os grupos políticos.
Ademais da presión política, iniciouse unha campaña de presión social baseada nunha recollida de firmas a través de Change. org iniciada por EME e Araceli Gabaldón, afectada de Esclerose Múltiple, á que se sumou Aedem-Cocemfe, animando a asinar a petición (http://chng.it/s2Z7bmvgdD) e darlle difusión para lograr o maior número de sinaturas que avalen esta reivindicación. Para darlle máis visibilidade está a utilizarse o hashtag #33AGORA
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
