Publicado por 
A portavoz popular, Elena Muñoz, acompañada dos concelleiros Diego Gago e Miguel Fidalgo, visitou hoxe os terreos onde está proxectado o futuro pavillón municipal de Matamá, onde urxiu ao goberno local a poñer diñeiro no orzamento de 2019 para poder acometer esta infraestrutura e a realizar a modificación urbanística necesaria.
“Os veciños levan esperando 25 anos por este pavillón”, continuou a líder dos populares, quen subliñou que para facelo realidade resulta imprescindible un “compromiso firme”. “O alcalde e o seu equipo, ata a data, só fixeron fogos artificiais, sacándose un proxecto da manga, e mandándollo á Xunta para que aplique unha lei que aquí non se pode aplicar”, profunda.
A este respecto, Elena Muñoz destacou que o feito de “que Matamá teña un pavillón está en mans do goberno local, porque é competencia municipal”, motivo polo que, como anunciou, o seu grupo leva ao pleno de mañá unha moción na que insta o executivo a dar os pasos necesarios cara a esta infraestrutura deportiva.
“Hai que facer a modificación urbanística necesaria, que só ao goberno municipal compételle; neste caso un PERI. E hai que poñer diñeiro no orzamento municipal de 2019, porque a cantidade consignada agora mesmo é de 0 euros”, continuou a portavoz popular.
Neste marco, Elena Muñoz avogou por traballar con “seriedade e rigor” porque “os veciños de Matamá non se merecen máis erros, nin promesas baleiras de contido coa única vontade política de confrontar coa Xunta de Galicia”.
Por este motivo, e como incidiu, “levámolo mañá ao pleno esperando que non lle sigan dando as costas a Matamá”. “O demais é querer rizar o rizo, seguir na confrontación, perder o tempo e facerlle perder o tempo aos veciños de Matamá, que 25 anos despois non se merecen máis longas nin guerras estériles entre administracións”, concluíu.
