O profesorado galego iniciará as mobilizacións para recuperar o seu horario, que culminarán cunha folga en decembro

Os sindicatos do ensino aprobaron unanimemente un calendario de mobilizacións para recuperar o horario lectivo do profesorado previo ao aumento decretado no 2012. Esixen volver ás 21 horas en primaria (fronte ás 25 actuais) e 18 en secundaria (actualmente, 20).
Publicado por o día 12/11/2019 na sección de CC.OO,Educación,Sindicatos

O profesorado galego iniciará as mobilizacións para recuperar o seu horario, que culminarán cunha folga en decembro

A primeira acción será unha concentración de delegados e delegadas fronte á Consellaría de Educación, o próximo xoves, día 13 de novembro, ás 11:30 horas.

A vindeira semana, o xoves 21, haberá concentracións de profesorado nas sete cidades, a partir das 19:30 horas.

Se non houber resposta positiva por parte da Consellaría, o profesorado galego está chamado á folga de aquí a un mes, o xoves 12 de decembro.

Redución do horario lectivo, non do laboral

Os sindicatos insisten en que as demandas do profesorado son «xustas». Ademais, aclaran que non están a pedir unha redución do horario laboral, senón do lectivo. Isto permitiría usar máis horas para tratar cuestións organizativas e dar unha atención personalizada ao alumnado.

A secretaria xeral de CCOO-Ensino, Luz López, coida unha «falta de respecto» que a Xunta teime en non tratar esta cuestión, xa que a Administración galega foi das primeiras en acometer recortes en todo o Estado, mentres que na recuperación de dereitos «vai a remolque». A dirixente sindical insta a Consellaría de Educación a «tomar nota» doutros Gobernos autonómicos que xa iniciaron ou mesmo remataron o proceso de recuperación do horario lectivo previo ás modificacións do 2012.

Comentar noticia

Your email address will not be published.