atlanTTic foi o máis madrugador, pero nas últimas semanas de novembro e as primeiras de decembro, os catro centros singulares de investigación da Universidade de Vigo irán pouco a pouco abrindo as súas portas para que a cidadanía coñeza os segredos que agochan os seus laboratorios, os experimentos que desenvolven e os proxectos innovadores nos que traballa o seu persoal.
As actividades enmárcanse no programa Divulgando Ciencia Singular, financiado pola Secretaría Xeral de Universidades, que ten como finalidade dar a coñecer a actividade investigadora e a importancia que esta ten para a sociedade en xeral. A próxima cita será este venres 28 e sábado 29, cando o Centro de Investigacións Biomédicas e o Centro de Investigación Mariña celebren as súas xornadas de portas abertas, con talleres, visitas guiadas, experimentos, etc. Queda por concretar a data e o programa de actividades do Centro de Investigación en Tecnoloxías, Enerxía e Procesos Industriais (Cintecx).
Paseo en barco, obradoiros e visitas guiadas en Toralla para coñecer o CIM
As actividades do CIM dentro do programa Divulgando Ciencia Singular estaban previstas para esta pasada fin de semana pero, por mor das condicións climatolóxicas, trasladáronse para o próximo venres e sábado, 29 e 30 de novembro. As súas xornadas de portas abertas comprenden tres actividades diferentes: Embárcate co CIM, Coñece o CIM en Toralla e Coñece o CIM no Campus, todas elas de balde pero con prazas limitadas, polo que é necesario facer inscrición previa a través da web cienciasingular.gal.
O programa arrancará o venres con visitas guiadas ás instalacións na illa de Toralla e, por primeira vez, na torre Cacti do campus universitario. Así, na Ecimat as persoas participantes visitarán por exemplo o peirao, os laboratorios húmidos e secos, as cámaras de cultivo de fitoplancto e zooplancto, a sala de maquinaria, etc. As persoas que opten pola visita ao campus percorrerán os laboratorios de catro grupos de investigación que desenvolven o seu labor na torre Cacti. Para as visitas ao campus habilitarase un servizo de autobús gratuíto con saída dende praza de América e praza de España de Vigo. Estas dúas actividades estarán divididas en tres quendas cada unha ás 12.00, 15.30 e 17.00 h.
O sábado 30 o CIM invita á sociedade a un percorrido en barco entre o peirao de A Laxe e a illa de Toralla, na que as persoas participantes poderán descubrir interesantes curiosidades sobre a ría de Vigo e ver funcionando un robot subacuático. Xa na illa, realizarán unha visita pola Ecimat guiada por investigadores e especialistas en divulgación mariña e realizarán unha actividade interactiva de laboratorio antes de regresar ao barco. Para esta actividade haberá dispoñibles tres grupos con saída ás 09.00, 12.15 e 15.30 h desde o peirao de A Laxe.
O Cinbio dáse a coñecer en Ourense e Vigo
O Centro de Investigacións Biomédicas apostou por darse a coñecer tanto en Vigo, onde se localizan as súas instalacións, como na cidade de Ourense. A primeira das actividades tivo lugar este pasado venres coa instalación dunha carpa na rúa do Paseo, en Ourense, que dará paso este venres 29 de novembro a unha serie de actividades relacionadas coa bioinformática e os produtos bioactivos no edificio Politécnico de Ourense de 16.30 h a 19.00 horas. As persoas que asistan poderán participar en obradoiros sobre a intelixencia artificial no ámbito sanitario e sobre o papel das biomoléculas activas no día a día, por exemplo, os antioxidantes ou os biopolímeos.
Esta semana arrancan tamén as actividades en Vigo, coa instalación nas galerías Porta Príncipe dun posto informativo que se poderá visitar o xoves de 16.00 h a 20.00 h. Esta acción completarase cunha xornada de portas abertas nas instalacións de Cinbio o xoves 5 de decembro de 16.30 a 19.20 horas nas que as e os asistentes poderán participar en tres actividades diferentes: Mergúllate no cancro e se quen de extraer o ADN; O GPS do teu cerebro e CO2 o yin e o yang do noso ecosistema.
150 persoas na Escola de Enxeñaría de Telecomunicación para descubrir atlanTTic
O centro de investigación en Tecnoloxías de Telecomunicación, atlanTTic, foi o primeiro en desenvolver as súas actividades dentro de Divulgando Ciencia Singular acadando moi boa resposta entre a cidadanía. O pasado día 15 máis de 150 persoas se achegaron ata as instalacións do centro na Escola de Enxeñaría de Telecomunicación para participar nunha ducia de obradoiros e experimentos a través dos que coñecer en detalle novas tecnoloxías da comunicación e a súa aplicación á vida cotiá.
Entre outros temas, as persoas participantes puideron descubrir, coñecer e probar de primeira man ferramentas como as como apps de acompañamento a persoas maiores ou de detección precoz do alzhéimer, as impresoras 3D, os nanosatélites, o recoñecemento facial, as ferramentas de detección de manipulación en imaxes ou o uso do radar e a xeolocalización para loitar contra os incendios, entre outras. Un “balance moi positivo” desta xornada que “volve reflectir o interese da cidadanía por todo o traballo que estamos a desenvolver en atlanTTic, onde abordamos numerosos retos da sociedade con tecnoloxías de telecomunicación en ámbitos como a saúde, o medio ambiente ou a seguridade nas comunicacións. Actividades como estas permítenos facer chegar este traballo á sociedade, que saiba que se fai investigación de calidade cerca, nos centros da Universidade de Vigo, en moitos casos con xente moza e moi motivada”, salienta Carlos Mosquera, director do centro de investigación. Grande éxito acadaron tamén as visitas guiadas laboratorio de seguimento de satélites que complementaban a actividade e que esgotaron todas as prazas dispoñibles en pouco tempo.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.