Paco Nogueiras, esta semana en LIBROS PARA SOÑAR

Publicado por o día 11/02/2015 na sección de Cultura

Paco Nogueiras, esta semana en LIBROS PARA SOÑAR

O músico Paco Nogueiras será o invitado da sesión de contos para bebés que se realizará este mércores ás 17:30 horas en LIBROS PARA SOÑAR. O artífice dos temas do libro-disco “Brinca Vai!” ofrecerá, nesta ocasión, unha pequena sesión de contacontos e música na que o repertorio estará formado polo conto tradicional “Chibos chibóns”, o poegrama “Violín” da colección “Do berce á lúa”, e “Colores” de Leo Lionni. Será pois, unha sesión cun gran predominio da canción e da melodía como ferramentas para entreter os meniños e meniñas, estimulando a súa percepción do ritmo e da sonoridade.

Non será a única actuación de Paco Nogueiras, que voltará a LIBROS PARA SOÑAR este venres día 13, ás 18:30 horas, para protagonizar a sesión habitual de contacontos, cun concerto no que incluirá algunha canción do seu “Brinca Vai!”, ilustrado por David Pintor e con vídeos musicais do artista visual vigués José Miguel Sagüillo. Entre os temas que vai interpretar non faltará “O Entroido move o corpo”, a propósito destas festas tan celebradas polos nenos e nenas, que poderán acudir a LIBROS PARA SOÑAR lucindo os seus disfraces.

Ademais, Paco Nogueiras contará contos que complementará con melodías de creación propia.

PRENSA KALANDRAKA