O Parlamento Galego solicita a Fomento e Audasa a instalación de pantallas antirruído nas obras de ampliación da AP-9

“Estas medidas paliarían de maneira importante os prexuízos derivados do aumento do tráfico, especialmente se o alcalde de Vigo cumpre finalmente a súa ameaza de impedir o tráfico pesado pola rúa Sanxurxo Badía”, indicou o deputado popular
Por o 17/01/2017 | Sección: Partido Popular,Política,Vigo
O Parlamento Galego solicita a Fomento e Audasa a instalación de pantallas antirruído nas obras de ampliación da AP-9
Compartir en:

O Parlamento de Galicia aprobou esta tarde a proposición non de lei do Grupo Popular a través da que se insta ao Ministerio de Fomento e a Autopistas del Atlántico S.A. (Audasa) para que, no marco das obras de ampliación da capacidade da AP-9 que se están a realizar na entrada de Vigo, se proceda a cumprir co seu compromiso de instalar pantallas antirruído naqueles puntos onde sexa necesario de acordo á normativa vixente, adoptando medidas paliativas que minimicen o impacto da autoestrada e melloren a compatibilidade desta infraestrutura coa contorna construída e co día a día dos veciños.

O deputado do Grupo Popular Alberto Pazos lembrou que a ampliación da autoestrada AP-9 “afectaba gravemente a distintos enclaves do concello de Redondela, como o Colexio Igrexa, os accesos a Trasmaño ou os restos históricos da fortaleza de Rande”. “Porén, estes problemas foron minimizándose gracias, fundamentalmente, ao bo facer do equipo Goberno municipal de Redondela”, apuntou.

Alberto Pazos manifestou que “unha das cuestións máis preocupantes para os veciños de Redondela é o incremento do tráfico rodado consecuencia desta ampliación, o que conleva un aumento do ruído”. Por este motivo, a Comisión de Seguimento das obras, impulsada polo Concello e na que están representados os grupos municipais, as asociacións de veciños, o Ministerio de Fomento e Audasa, adquiríronse os compromisos de dotar dun asfaltado especial para absorber o ruído na capa de rodadura e dotar de pantallas antirruído.

“Estas medidas paliarían de maneira importante os prexuízos derivados do aumento do tráfico, especialmente se o alcalde de Vigo cumpre finalmente a súa ameaza de impedir o tráfico pesado pola rúa Sanxurxo Badía”, indicou.