O Plan Integrado de Emprego de Mos acada un 73% de inserción laboral a catro meses do seu remate

O municipio alcanza ademais a menor taxa de paro dos últimos 8 anos
Publicado por o día 16/05/2017 na sección de Galicia,Mos,Vigo

O Plan Integrado de Emprego de Mos acada un 73% de inserción laboral a catro meses do seu remate

A alcaldesa de Mos e o concelleiro de Promoción Económica e Emprego, Óscar Soto, aportaron onte datos moi optimistas e positivos sobre a evolución das cifras do paro no municipio mosense. Cifra que descendeu dende os 1.900 desempregados no ano 2013 (data na que se alcanzou o pico de mosenses en paro) ata as 1.294 persoas en situación de desemprego actuáis, dato que representa o máis baixo dende o ano 2009, cando había un total de 1.417.

Esta evolución foi posible, tal e como explicaron os representantes municipais, grazas ás políticas activas de emprego que se desenvolven dende a Axencia de Colocación mosense e que inclúen dende orientación laboral e asesoramento a emprendedores, ata Obradoiros de Emprego, Accións Formativas para Desempregados, Plans de Emprego, etc.

As políticas activas de emprego municipais permitiron e propiciaron que o número de novos contratos en Mos fose en nivel sempre ascendente dende o ano 2009, incrementándose dende as 204 novas contratacións de media ao mes naquel ano, ata as 547 actuais; unha progresión que de sobra demostra a eficacia dos programas municipais de fomento do emprego.

Precisamente dun deses programas, o Plan Integrado de Emprego Mos 3.0, estase actualmente a realizar a súa II Edición cuns magníficos resultados. O II PIE 3.0 iniciouse o 1 de setembro de 2016 e rematará o 31 de agosto do presente ano 2017. Conta cunha inversión económica total de 132.263,49 euros, dos que 104.426 euros son subvencionados pola Consellería de Economía, Emprego e Industria e o resto asúmeo a propia administración local mosese. Este segundo PIE conta cun total de 60 persoas beneficiarias, da cales 53 son menores de 30 anos e as 7 restantes maiores de 30 anos.

As accións que se levan a cabo dende o Plan de Emprego son orientación laboral personalizada, asesoramento a emprendedores/as, formación e prácticas en empresas.

Durante os seis primeiros meses do PIE impartíronse 23 accións formativas que supuxeron un total de 333 horas lectivas, asináronse convenios con 5 empresas, contactouse cun total de 217 empresas de distintos sectores e tramitáronse 110 ofertas de emprego.

44 dos 60 usuarios /as do II PIE Mos 3.0 traballaron ou traballan dende o inicio do plan, o que supón a elevadísma porcentaxe do 73%, tendo en conta que aínda faltan 4 meses para que finalice. Algún dos usuarios xa tivo máis dun contrato.

Ante estes datos, cando menos clarificadores, Arévalo e Soto concluíron sentirse “satisfeitos de que o esforzo estea a dar os seus froitos e que, aínda que con este tema tan delicado hai que ser moi prudentes e cautos, hoxe podemos dicir alto e claro que Mos ten a menor taxa de paro dos úntimos 8 anos”.