Podemos Vigo esixe ao goberno municipal do PSOE que escoite ao novo comité de persoal do consistorio e poña solución aos problemas de Benestar Social

Publicado por o día 12/11/2015 na sección de Podemos,Política

Podemos Vigo esixe ao goberno municipal do PSOE que escoite ao novo comité de persoal do consistorio e poña solución aos problemas de Benestar Social

Podemos Vigo considera un verdadeiro insulto á cidadanía o uso interesado que o goberno socialista de Abel Caballero fai dun área tan importante para a cidadanía como é Benestar Social.

Esta formación atopa unha manifesta contradición entre as continuas declaracións triunfalistas e de autopropaganda do alcalde do PSOE e as liñas estratéxicas feitas públicas polo novo comité de persoal do Concello, nas que sinalaban como prioritario “acabar co caos en Benestar Social”.

Para Podemos Vigo, Caballero falta á verdade cando presume de orzamentos sociais, igual que cando afirma que “en Vigo ninguén dorme na rúa”, “en Vigo a oficina antidesahucios é a miña mesa” e outras afirmacións na mesma liña. Pero ademais, esta formación se cuestiona como se poderán xestionar de xeito eficiente uns orzamentos aos que se aplica o cualificativo de “os máis sociais de toda España”, cando o departamento de Benestar Social atópase sumido no caos: esperas de 7 meses para trasladar solicitudes de axudas á Xunta de Galicia -tempo durante o cal os beneficiarios atópanse abandonados á súa sorte-, un persoal de traballo social que, pese á súa recente ampliación, segue situándose en pouco máis do 50% do establecido pola lei ou a nefasta xestión das axudas de urxencia, causantes das chamadas “colas da vergonza”, así como a inexistencia dun parque público de vivenda en réxime de aluguer social son só algúns dos puntos escuros deste departamento. Puntos escuros que, por outra banda, o socialista vigués ignora sen a menor vergonza, faltando non só á verdade, senón ata ao respecto das usuarias deste servizo.

Desde Podemos Vigo, esiximos ao goberno do PSOE que minore os titulares grandilocuentes e deixe de facer campaña electoral co diñeiro para primeiras necesidades das cidadás pero, especialmente, esixímoslle que intente superar a xordeira selectiva que o aqueixa e atenda ás peticións dos diversos colectivos sociais da cidade, que levan tempo denunciando esta bochornosa situación e aos que agora se suma o comité de persoal do Concello.

PRENSA PODEMOS VIGO