Pontevedra acolle unha proba da Copa de España de ciclocross coa mirada posta na Copa do Mundo

Terá lugar o 1 de decembro e podería ser a antesala para optar a ser sede da máxima competición a nivel internacional
Publicado por o día 05/09/2019 na sección de Galicia,Pontevedra

Pontevedra acolle unha proba da Copa de España de ciclocross coa mirada posta na Copa do Mundo

“Imos converternos de novo nun referente nunha actividade deportiva, neste caso o ciclocross, no Estado español pero tamén queremos selo a nivel internacional” aseguraba esta mañá a concelleira Anabel Gulías na presentación de Pontevedra como sede dunha das probas da Copa de España de ciclocross. A concelleira, que estivo acompañada polo presidente da Federación Galega de Ciclismo, Juan Carlos Muñiz, anunciou que o vindeiro 1 de decembro a cidade do Lérez acollerá unha das probas internacionais da categoría C-2 da Copa de España, mentres que os días 11 e 12 de xaneiro de 2020 volverá ser a sede do Campionato de España.

Gulías e Muñiz aseguraron que a concesión de ambos campionatos a Pontevedra, sitúana no camiño de acadar o obxectivo de converterse na sede da Copa do Mundo de Ciclocross por ser esta a fórmula para acreditar experiencia na organización deste tipo de probas. Segundo explicou Juan Carlos Muñiz “unha proba categoría C-2 é unha antesala para facer acoller unha proba de categoría C-1 e con esa experiencia podemos presentar a candidatura a esa Copa do Mundo, que esperamos poder lograr para o 2021 0u 2022 porque xa estamos no camiño de poder soñar”. Unha idea na que tamén incidiu Anabel Gulías asegurando que “cremos que temos as condicións e a capacidade para acollela e imos ir a por ela”.

O presidente da Federación Galega de Ciclismo lembrou que a presenza de Pontevedra no mundo do ciclocross comezou “fai catro anos cando sacamos o primeiro ciclocross en Campañó, que primeiro foi unha proba da Copa Calicia e despois do campionato galego, é  que agora xa é unha proba instalada no calendario, e grazas á implicación do Concello  de Pontevedra pasamos a ser sede dos campionatos de España no 2019, que non se celebraban en Galiza desde o ano 2006”. Muñiz asegurou que “este ano que se celebrou aquí en Pontevedra tivo unha participación record, e volvemos presentar a candidatura para  ser sede no 2020 e concedeuse cunha maioría aplastante e absoluta”.