Profesionais sanitaros do Hospital Álvaro Cunqueiro unidos fronte ao cancro de mama

A EOXI de Vigo conmemorou o Día Mundial do Cancro de Mama con diversas accións, entre elas un obradoiro de panos na cabeza dirixido ás pacientes
Publicado por o día 23/10/2018 na sección de Galicia,Sanidad,Vigo

Profesionais sanitaros do Hospital Álvaro Cunqueiro unidos fronte ao cancro de mama

Profesionais sanitarios da EOXI de Vigo de diversas disciplinas relacionadas co cancro de mama- oncólogos, cirurxiáns, patólogos, radiólogos, e enfermeiras- xunto con representantes da dirección e da Asociación de pacientes ADICAM, quixeron conmemorar o Día Mundial do Cancro de Mama posando xuntos ante a escultura “O Titán” -iluminada de cor rosa- para escenificar a súa adhesión a este día e o seu compromiso conxunto con esta enfermidade.

Ademais, o persoal de enfermaría do Hospital de Día de Oncoloxía organizou un obradoiro estético dirixido ás pacientes, para amosarlles os distintos xeitos de colocarse os panos na cabeza naquelas que elixen este complemento para minimizar o impacto que produce a caída do pelo tras algúns tratamentos, e axudarlles a responder dubidas ao respecto. Trátase do primeiro obradoiro, e ante a alta demanda de solicitudes recibidas polas pacientes para participar, decidiuse darlle continuidade e realizalo unha vez ao mes.

Consulta Asesoramento de Risco Familiar

Segundo afirman os especialistas, a prevención e o diagnóstico precoz son fundamentais na loita contra esta enfermidade. Neste senso, ademais dos programas preventivos de cribado poboacional – nos que se realizan mamografías a todas as mulleres entre 50 e 69 anos – tamén é importante a estratificación das pacientes por nivel de risco.

Así, un dos fitos máis significativos neste eido foi a creación -hai seis anos- da Consulta de Asesoramento de Risco en cancro de Mama na Unidade de Patoloxía de Mama do Meixoeiro. Nesta consulta específica aténdese ás pacientes que por franxa de idade non son subsidiarias dun cribado poboacional, pero que, por antecedentes persoais ou familiares, precisan dun seguimento diferente. Esta consulta leva atendidas a 3800 pacientes.

As pacientes poden ser derivadas desde Atención Primaria ou Hospitalaria e realízaselles unha historia persoal, unha árbore xenealóxica, e aquelas probas necesarias para establecer o nivel de risco de desenvolver a enfermidade.

Tamén, naquelas pacientes con indicación, realízanse solicitudes de estudo xenético, aínda que os especialistas subliñan que o cancro de mama hereditario representa menos dun 10% de todos os cancros de mama.

Hoxe en día, as probas xenéticas para detectar xenes causantes do cancro hereditario teñen mellorado moito coa introdución de técnicas de secuenciación masiva, que permiten
estudar ao tempo moitos xenes nun mesmo individuo e sobre todo axilizan os tempos de espera dos resultados do estudo xenético.

En conclusión, as vantaxes desta Consulta especifica de Asesoramento de Risco Familiar son evidentes: aquelas pacientes que cumpren criterios de risco familiar ou persoal benefícianse dun cribado personalizado; establécense con elas as medidas de prevención secundaria pertinentes (Mamografía, Tomosíntese, Ecografía e Resonancia Magnética); e ademais, nalgúns casos, realízase prevención primaria, como son as cirurxías redutoras de risco de cancro de mama e de ovario, que ás veces, se está indicado, efectúanse ambas no mesmo acto cirúrxico.

350 novos casos anuais

Unidade de Patoloxía de Mama, emprazada no hospital Meixoeiro, ofrece unha abordaxe integral das lesións mamarias, tanto benignas como malignas. Así, neste hospital centralízase, ademais das probas de diagnóstico por imaxe, todos os tratamentos cirúrxicos e radioterápicos de mama realizados no Chuvi.

Esta Unidade é un exemplo da interdisciplinaridade e da integración nun mesmo dispositivo asistencial de profesionais sanitarios de distintas categorías e especialidades. Conta cun Comité de Patoloxía de Mama, que se reúne semanalmente e que está integrado por radiólogos, cirurxiáns, xinecólogos, patólogos, oncólogos e enfermeiras, e en cada xuntanza semanal debaten cada caso de forma individual, tanto antes do tratamento (cirurxía ou radioterapia) como despois de realizado o primeiro deses tratamentos.

Os profesionais diagnostican 350 casos novos de cancro de mama ao ano. O pasado ano na Unidade realizáronse 586 operacións e 7.500 consultas médicas. Ademais, nesta Unidade realízanse anualmente máis de 10.100 mamografías, 6.900 ecografías e 1.000 biopsias guiadas por imaxe.

Hai que subliñar que desde este ano, a Unidade tamén organiza as axendas de Resonancia Magnética de Mama, realiza a revisión de todas as solicitudes e participa na información das mesmas.

A maioría dos pacientes atendidos son derivados desde a Atención Primaria, aínda que tamén dos especialistas do CHUVI e do Programa Galego de Detección Precoz do Cancro de Mama.

Dispón dunha “vía rápida” para casos de sospeita de carcinoma de mama; isto é, un circuíto asistencial que garante que calquera paciente con sospeita dunha lesión mamaria sexa atendido nesta unidade en menos dunha semana.

No momento actual, o Meixoeiro conta cos equipamentos tecnolóxicos máis avanzados para o diagnóstico desta enfermidade que permiten gran precisión, o que facilita o diagnóstico de cancros moi pequenos e sutís, e sobre todo en estadíos máis temperáns.

Dobre superficie para Unidade de Mama

Precisamente o pasado luns tivo lugar a Acta de replanteo -marca o inicio oficial das obrasda Unidade de Mama do Meixoeiro. Con esta actuación vaise ampliar, mellorar e integrar nun único servizo todos os recursos diagnósticos da mama da área de Vigo, tanto os de cribado poboacional como os de diagnóstico hospitalario.

Esta Unidade cambiará de emprazamento trasladándose á planta -1, a uns espazos que duplicarán á superficie dos actuais, pasando de 400 metros cadrados aos 860 da nova localización. Ademais, integrarase na mesma zona o Programa Galego de Detección Precoz do Cancro de Mama que se ven desenvolvendo na Casa do Mar de Vigo.

No seu programa funcional, a nova Unidade contará cun acceso directo desde o exterior, e distribuirase en tres áreas diferenciadas conforme a súa actividade asistencial. Na primeira das zonas, habilitarase unha ampla sala de espera e consultas para tres cirurxiáns e dúas enfermeiras. A seguinte será a área de exploración de pacientes, na que se localiza o equipamento tecnolóxico -tres ecógrafos, un mamógrafo e unha mesa de estereotaxia-. Ademais, contará cunha área administrativa, con cinco salas de informes, dous despachos, sala de estar, e unha sala de xuntas.

As instalacións do Programa de Detección Precoz terán unha distribución e dotacións que permiten o seu funcionamento de forma independente do resto da Unidade, pero coa vantaxe de encontrarse integrado dentro da mesma. As súas instalacións disporán dunha ampla sala de espera, con aseo público para as usuarias, dúas salas de informes, cabinas, dous mamógrafos e un despacho.