Quince concellos de toda Galicia exhibirán filmes en galego no marco do programa Redecinema

O secretario xeral de Política Lingüística, Valentín García, presentou esta mañá en Rodeiro unha nova edición do programa de cinema de verán na rúa Redecinema, impulsado pola Consellería de Cultura, Educación e Ordenación Universitaria, que este ano chegará a 15 concellos pertencentes á Rede de Dinamización Lingüística (RDL). Desta vez, os filmes escollidos son as (co)producións galegas O Apóstolo, Sinbad, Pérez, o ratiño dos teus soños e Mimosas. Todas as proxeccións realizaranse no exterior, agás en caso de chuvia, no que se trasladarían a espazos cubertos.

Valentín García explicou que o obxectivo desta iniciativa, −que desenvolven en colaboración as secretarías xerais de Política Lingüística e de Cultura e mais a Axencia Galega das Industrias Culturais (Agadic) − é ofrecerlle á cidadanía opcións de ocio e lecer na lingua propia de Galicia, contribuíndo así a dinamizar o seu uso. Deste xeito, e dado o público dos filmes escollidos, incídese de feito especial na poboación máis nova, de acordo coas accións que desde a Xunta de Galicia se están a realizar para impulsar o uso do galego entre nenos e mozos, que culminará coa publicación do Plan de dinamización da lingua galega na mocidade, actualmente en elaboración.

Así mesmo, o secretario xeral de Política Lingüística salientou que programas como Redecinema contribúen a achegar o cinema e a cultura polo territorio galego, neste caso aos concellos da RDL. A canda Valentín García participou na presentación o alcalde de Rodeiro, Luís López Diéguez.

Ribeira, Cerceda, A Baña, Abegondo e Carral, na provincia da Coruña; Triacastela e Sober, na de Lugo; Ribadavia e Boborás, na de Ourense; e Rodeiro e O Rosal, na de Pontevedra; son as localidades confirmadas do total de 15 concellos da Rede de Dinamización Lingüística onde se celebrarán durante todo o mes de setembro as proxeccións ao aire libre dos mencionados filmes galegos. O calendario do programa poderá verse no Portal da Lingua Galega (www.lingua.gal/redecinema) e na Axenda de Cultura de Galicia (www.cultura.gal/axenda).

Dinamización lingüística

De acordo co Plan xeral de normalización da lingua galega, o programa de dinamización lingüística Redecinema persegue promover o uso do galego nas actividades lúdicas e de lecer; visibilizar a acción dinamizadora en lugares abertos e públicos; potenciar creadores e dinamizadores galegos e favorecer a incorporación da nosa lingua á programación das actividades para o verán realizadas polos concellos, ademais de apoiar e promover a industria cultural, nomeadamente a audiovisual galega e en galego.

Os destinatarios do programa Redecinema, que a Consellería de Cultura e Educación desenvolve a través da AGADIC e das secretarías xerais de Política Lingüística e de Cultura, son os concellos pertencentes á Rede de Dinamización Lingüística (RDL). A RDL é unha iniciativa da Xunta de Galicia que busca a asociación voluntaria de entidades con competencia na promoción e no uso da lingua galega no ámbito local para impulsar e reforzar as iniciativas de difusión do galego. Os seus principais obxectivos son os de promover a cooperación e a coordinación das actuacións en materia de dinamización lingüística e de optimizar os recursos dispoñibles para levala adiante.