Recuperemos a xestión pública dos saltos hidroeléctricos da Galiza

A recuperación da xestión pública evitaría a especulación e beneficiaría a todo o pobo galego
Publicado por o día 21/02/2017 na sección de BNG,Economía,Galicia,Política,Vigo

Recuperemos a xestión pública dos saltos hidroeléctricos da Galiza

A recuperación da xestión pública evitaría a especulación e  beneficiaría a todo o pobo galego.

O BNG pedirá no Parlamento Galego que a Xunta estude a viabilidade dunha tarifa eléctrica galega.

As deputadas Olalla Rodil e Noa Presas participaron esta mañá dun acto simbólico no encoro dos Peares. Acompañadas dun grupo de militantes despregaron dúas pancartas nas que se podía ler “Tarifa eléctrica galega” e “Galiza produce, Madrid consume”.

Con esta acción, o BNG quixo amosar que é posíbel actuar desde as institucións para regular o mercado eléctrico permitindo que as galegas e galegos se poidan beneficiar da condición de produtora enerxética de Galiza.

Olalla Rodil explicou como “das 44 centrais de gran hidráulica operativas na actualidade en Galiza, 31 delas foron impulsadas durante a ditadura franquista, de xeito alleo aos intereses e necesidades de Galiza e xerando grandes custos sociais e medioambientais”.

Para exemplificar o nulo beneficio que teñen as poboacións que acollen o impacto da produción Rodil recordou como “hai uns días tivemos que ver como perto de aquí, en Portomarín ou O Saviñao, onde se anegaron parroquias enteiras para construír Belesar, estiveron até 5 días sen luz” para engadir que “con xestión e control público isto non pasaría”.

Neste sentido, Noa Presas engadiu que “estamos nun momento clave. Moitas desas concesións están a piques de caducar e instamos á Xunta a que recupere a xestión pública dos saltos hidroeléctricos mediante unha empresa pública”. Sobre os beneficios que isto xeraría para a poboación, Presas engadiu que “nun momento onde todo o mundo fala de pobreza enerxética desde o BNG queremos sinalar a nosa riqueza enerxética. Este tipo de construcións están amortizadas e é hora de que revertan no ben da veciñanza. O propio goberno recoñeceu nunha pregunta do BNG que só unha destas concesión ten cláusulas sociais, polo que estamos a regalar os recursos a cambio de nada”.

Tarifa eléctrica galega

Diante desta situación, o BNG pedirá no Pleno do Parlamento Galego que a Xunta estude a viabilidade dunha tarifa eléctrica galega. Ao respecto, Rodil lembrou que “segundo os últimos datos do INEGA (2012) Galiza exporta un 40% da electricidade e como vemos en Belesar, temos na nosa terra o impacto da produción. Porén, non temos ningún beneficio mentres o Estado acrecenta a carga impositiva da factura”

Pola súa banda, Presas recordou como “de acordo cos cálculos realizados, a fixación dunha tarifa eléctrica galega que permitise compensar o impacto ecolóxico e social causado pola instalación destas infraestruturas suporía unha redución directa do recibo da luz nos fogares e tamén nas empresas por volta dun 30%. Desta maneira, Galiza podería beneficiarse do feito de ser excedentaria de enerxía” ao contrario do que está a acontecer na actualidade onde a veciñanza localizada a carón dos encoros non conta nin con subministro suficiente. “