Un redactor da TVG pide amparo pola emisión dunha noticia súa manipulada

Eliminaron as críticas á Xunta de Galicia e un parágrafo da información.
Por o 14/03/2017 | Sección: CC.OO,Galicia,Sindicatos,TV,Vigo
Un redactor da TVG pide amparo pola emisión dunha noticia súa manipulada

O luns, 6 de marzo, o ‘Galicia Noticias Serán’ daba unha noticia premeditadamente recortada para eliminar partes que se emitiran na edición do mediodía.

Un redactor de longa traxectoria e recoñecido prestixio elaborou unha peza informativa sobre o cultivo de ostras en Galicia baseado en entrevistas feitas na Universidade de Santiago a un equipo de investigación en acuicultura. Unhas entrevistas que non buscou el, senón que, neste caso, lle asignaran a primeira hora da mañá sen tempo para documentarse no tema sobre o que versaban. Despois elaborou esta información para o programa Galicia Noticias Mediodía.

Na edición da tarde, Galicia Noticias Serán, a nova quedou «mutilada», como o mesmo traballador afirma, aínda que mantiveron a súa voz en off. Esta mutilación foi para evitar que a audiencia escoitase a declaración dun técnico que criticaba a actitude do Goberno autonómico na cría e cultivo de moluscos en Galicia. Ese técnico dicía que a Xunta está desaparecida na atención e explicaba o porqué en 22 segundos de intervención.

Tamén suprimiron o parágrafo final da noticia, que dicía: «Este especialista en cultivo de moluscos afirma que á Xunta non lle interesa aumentar a produción destas especies e lembra que nas depuradoras galegas predomina o marisco foráneo».

As escusas e argumentacións falsas en casos como este danse todo os días na redacción: a noticia demasiado longa para repetila integramente.

O comité de empresa da TVG en San Marcos esixe que cesen as prácticas de manipulación e que se poña en marcha axiña o Consello de Informativos comprometido na lei de medios. Tamén, que se asinen os traballos con rótulos onde apareza o nome da redactora ou redactor como xeito de visibilizar o traballo ben feito por parte das traballadoras e traballadores.

O comité rexeita enerxicamente este uso perverso da información elaborada por un xornalista con criterios profesionais «e non dependentes do que lles gusta oír aos gabinetes de comunicación en San Caetano».

Noticias de última hora en Vigo

Comentar noticia

Your email address will not be published.