A reforma do Colexio de Atín está en marcha por iso non teñen sentido mocións que a esixan

O goberno local censura a demagoxia do BNG e lémbralle ao seu voceiro que votaron a favor das súas dúas últimas mocións, que sí eran coherentes
Publicado por o día 04/04/2017 na sección de Galicia,Mos,Vigo

A reforma do Colexio de Atín está en marcha por iso non teñen sentido mocións que a esixan

A alcaldesa de Mos, Nidia Arévalo, e a concelleira de Educación, Kely Monzón, saliron hoxe ao paso da demagóxica nota de prensa publicada polo grupo municipal do BNG. Pídenlle neste sentido ao voceiro nacionalista, Miguel Anxo Aldea, “que non faga demagoxia con problemas que se están resolvendo por parte do Concello” e Arévalo e Monzón aclaráronlle a Aldea “que non se confunda, que resposta e explicacións tanto aos pais de alumnos/as do Colexio de Atín como do resto de centros educativos de Mos dámosllas constantemente, tanto a título persoal coma a través das directivas dos colexios e das ANPAS; e o facemos porque realizamos un seguemento constante e continuo de tódolos centros”, insistiron.

Así mesmo as representantes municipais lamentaron a actitude do BNG, “pois sempre que leva a Pleno mocións coherentes dende o grupo de goberno as apoiamos e llas votamos a favor”. Tal foi o caso das dúas últimas mocións nacionalistas presentadas, unha na sesión plenaria ordinaria do mes de decembro de 2016 relativa á estrada Puxeiros-Mos na que se instaba á Deputación a humanizala e outra no Pleno de xaneiro deste ano, relativa á imposición dunha taxa polo uso do dominio público local por parte das empresas eléctricas e de subministro de gas ou hidrocarburos.

É por elo que a rexedora local e a edil de Educación aclaran que “non imos votar a favor dunha moción que esixe melloras que se están levando a cabo”. Por outra banda Nidia Arévalo e Kely Monzón insisten en que “o equipo directivo do CEIP de Atín e do resto dos colexios de Mos trasládanos anualmente o listado das melloras que consideran máis convenientes para o ano seguinte, así coma as prioridades dentro dese listado; e son esas melloras as que se levan a cabo por parte das administracións autonómica e local”. Algunhas das prioridades que plantexou este centro para o curso pasado e que xa están acometidas foron habilitar a antiga vivenda do conserxe como comedor escolar e o cambio de falsos teitos nunha parte das instalación. Ambas obras foron acometidas pola consellería de Educación, asumindo unha parte do orzamento o propio Concello.

Ademais destes traballos, a empresa Coren xa cedeu os terreos necesarios para poder habilitar unha zona máis grande para o aparcadoiro escolar, cesión que foi xestionada dende o Concello.  Dito terreo xa foi obxecto de traballos de limpeza e actualmente estase a redactar un proxecto para a instalación dunha zona de recreo que lle será remitido á consellería de Educación da Xunta de Galicia en canto estea rematado e do que están ao tanto a dirección do centro e a Asociación de Pais e Nais de Alumnos/as.

Por outra banda dende o Concello de Mos estase esperando ao inicio das obras da senda peonil de Atín, que xa están adxudicadas por parte da Xunta, para unha vez rematadas poder acometer un novo acceso ao centro e eliminar as escaleiras actuais. A concelleira Monzón insiste en que “dende o Concello temos que esperar a que a Xunta realice esta obra para poder actuar na parte que nos compete”, por iso conclúe censurando “a demagoxia de Aldea e do BNG de Mos, que intentan facer oposición política empregando asuntos que xa se están resolvendo”.