Publicado por A conselleira do Mar, Rosa Quintana, puxo en valor hoxe en Vigo as iniciativas como o Premio de Deseño Anfaco-Fundación Banco Sabadell para impulsar o consumo das conservas do mar, promover as súas altas propiedades nutritivas e, á súa vez, enxalzar o talento da mocidade. Así o sinalou durante o acto de entrega deste recoñecemento ao talento creativo da xuventude que se dedica ao deseño e que nesta edición premia a liña de packaging para conservas de peixe e marisco da deseñadora gráfica Victoria Ochoa, de 20 anos.
Esta fórmula de deseño dos envases das conservas, expuxo a titular de Mar, axuda a facer partícipes ás novas xeracións da versatilidade gastronómica das conservas de peixes e mariscos. Tamén, engadiu, é un xeito de reivindicar o papel do sector transformador de produtos do mar, que durante o estado de alarma decretado polo coronavirus realizou un importante esforzo na estrita aplicación das medidas de prevención ditadas polas autoridades sanitarias ante a pandemia e no subministro de alimentos de calidade á cidadanía.
De aí a importancia de que a sociedade recoñeza ese labor para afrontar o futuro con garantías xuntos, no mesmo barco. Nesta liña, Rosa Quintana fixo fincapé no peso que ten a industria conserveira galega, que mantén o seu liderado nos primeiros postos do mercado europeo e mundial, que continúa abrindo novos mercados e segue espertando interese de novas inversións e amosou o compromiso de Galicia co sector para que “a través da innovación, a calidade e a materia prima siga traballando nesta liña de progresión”.
A creación gañadora do II Premio de Deseño Anfaco-Fundación Banco Sabadell utilizarase para empaquetar as latas que se empreguen na campaña de promoción de consumo de conservas do mar, denominada Cata a lata, de xuño do 2020 a xuño de 2021. Trátase dunha iniciativa que supón un estímulo para avanzar na innovación no envase da conserva no mercado.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
