Rubén Pérez propón no Calvario medidas de apoio ao comercio local e de proximidade para evitar os peches de establecementos que, por exemplo, neste barrio vai a un ritmo de cinco ao mes

Marea de Vigo levará ao pleno medidas para evitar a apertura de novos centros comerciais que danen ao comercio local e para conceder beneficios tributarios aos negocios de barrio, cuxa actividade beneficia á comunidade
Publicado por o día 18/05/2019 na sección de Galicia,Marea Vigo,Política,Vigo

Rubén Pérez propón no Calvario medidas de apoio ao comercio local e de proximidade para evitar os peches de establecementos que, por exemplo, neste barrio vai a un ritmo de cinco ao mes

O candidato da Marea de Vigo á Alcaldía, Rubén Pérez, estivo esta mañá co resto das persoas da candidatura no barrio do Calvario, onde visitou o Mercado e poido comprobar a crise que está a sufrir o pequeno comercio de proximidade. Rubén Pérez, que dende o Grupo municipal da Marea de Vigo mantivo permanentes contactos cos pequenos comerciantes, reiterou o seu compromiso cun modelo de negocio achegado á xente, “que está rexentado por veciños e veciñas, que crea emprego, e que ten unha actividade que beneficia á economía da comunidade”.

Rubén Pérez lembrou que, segundo os datos que manexan as propias organizacións de comerciantes, o barrio do Calvario perde unha media de cinco establecementos ao mes. Para o candidato da Marea de Vigo, trátase “dun dato contundente que amosa que, se non se toman medidas urxentes, o pequeno comercio desaparerá e, con el, desaparecerá tambén a identidade dos barrios e da propia cidade, ademais de postos de traballo”. O candidato da Marea de Vigo considera fundamental que se evite a creación de novos centros comerciais, nos que se instalan comercios de grandes cadeas de distribución que teñen capacidade para eliminar a competencia que lles supón o comercio local. Ante esta ameaza, é necesario defender dende as Administracións aos comercios dos veciños e veciñas de Vigo, que son unha parte fundamental da economía local. Entre as medidas que propón Marea de Vigo está a de facilitar a creación e supervivencia do pequeno comercio con medidas fiscais de competencia municipal.

Rubén Pérez lembrou que “nesta cidade, cando caía o sector naval ou cando caía a automoción, o comercio era actividade que creaba emprego e isto evitou que moitas familias se quedaran nunha situación de precariedade”. O candidato engadiu que “o comercio de proximidade é un sector de futuro, que adquire unha relevancia aínda maior nun momento de encarecemento do tansporte”. Referiuse en concreto ao barrio do Calvario, “que debe voltar a ser unha referencia comercial como foi nos anos 80 e 90”.

Pola súa banda, o candidato número tres e secretario xeral de Podemos en Vigo, Xaquín Pastoriza, destacou que o comercio de proximidade é máis sostible, tamén dende o punto de vista medioambiental, xa que normalmente opta polos productos locais que non requiren de grandes desprazamentos, cos efectos beneficiosos que isto ten sobre a pegada de carbono.