Sanidade incide na necesidade de manter precaucións á hora de recoller e consumir cogomelos para evitar posibles intoxicacións

Ao cociñalos recoméndase gardar unha mostra no frigorífico porque en caso de intoxicación pode ser de utilidade para os profesionais sanitarios
Por o 19/12/2017 | Sección: Alimentación,Sanidad
Sanidade incide na necesidade de manter precaucións á hora de recoller e consumir cogomelos para evitar posibles intoxicacións

Na época do outono cada ano máis persoas buscan, recollen, cociñan e comen cogomelos silvestres. Esta afección crecente está a aumentar o risco de que algunha persoa apañe, cociñe e coma cogomelos tóxicos, ben por descoñecer as graves consecuencias dunha intoxicación, ben pola falla de experiencia para distinguir con total seguridade os exemplares comestibles daqueles que non o son, ben por confiar en falsas probas, normas ou crenzas de que exemplares apañados son comestibles. Precisamente por iso, a Consellería de Sanidade lembra a necesidade de manter precaucións á hora de recoller e consumir cogomelos silvestres para evitar posibles intoxicacións alimentarias, que poderían causar incluso a morte.

Coa finalidade de evitar calquera suceso indesexado relacionado coa inxesta de cogomelos silvestres, Sanidade subliña que é fundamental saber distinguir con seguridade os cogomelos comestibles antes de consumilos.

Dende a Dirección Xeral de Saúde Pública lémbrase que se ben na nosa comunidade galega existen especies de cogomelos comestibles moi apreciados na gastronomía, tamén hai outros que son tóxicos ou moi tóxicos, e que poden chegar incluso a resultar mortais, polo que saber distinguir con total seguridade uns exemplares de outros é fundamental.

Na páxina web do Servizo Galego de Saúde (https://www.sergas.es/Saude-publica/Cogomelos) ofrécese información aos cidadáns sobre como previr as intoxicacións por inxesta de cogomelos.

Ante a dúbida á hora de identificar un cogomelo é mellor non recollelo. As persoas inexpertas deben apañar os cogomelos acompañados dun experto ou consultar con algún antes de consumilos. Ademais hai que procurar non mesturar as especies no mesmo cesto; non recollelos despois de grandes choivas ou en días de moita auga, xa que isto pode modificar as súas características e dificultar a súa identificación; e non transportalos en recipientes pechados ou bolsas de plástico, para evitar que fermenten.

As intoxicacións por cogomelos poden presentar cadros moi variados, pero en xeral pódese falar de dous ben distintos. No primeiro, aquelas en que os síntomas comezan nun tempo relativamente curto, 3-4 horas despois de comelos. As persoas intoxicadas cursan problemas dixestivos, náuseas, vómitos, diarrea e dor de barriga, xunto con alteracións visuais ou cambras. Polo xeral, adoitan ser de escasa gravidade e moi poucas veces poñen en perigo a vidas das persoas intoxicadas.

No segundo grupo, os síntomas comezan logo de 8 ou 10 horas -ou mesmo días- despois de ter inxeridos os cogomelos. Ademais de ser similares aos anteriores, poden resultar gravemente danados os riles e o fígado, cunha grande afectación do estado xeral da persoa intoxicada. Neste caso, sí poden causar a morte.

Ante calquera calquera síntoma de intoxicación, a persoa afectada debe acudir ao centro sanitario máis próximo de xeito inmediato e comunicarlle ao profesional médico a súa sospeita, darlle ao especialista algunha información sobre o tipo de cogomelo e, se é posible, levar unha mostra do exemplar (consumido ou non) para identificar correctamente a especie consumida. Tamén é importante informar do lugar onde foi apañado, indicar se varias persoas os comeron xuntas, xa que será preciso contactar con elas para saber se teñen os mesmos síntomas.

Finalmente, dende a Consellería de Sanidade apélase a non facer caso de falsas normas ou tradicións sobre o recoñecemento dos cogomelos que non teñen base científica. Este é o caso da falsa crenza de que todos os cogomelos que crecen na madeira ou nos prados son comestibles, ou os que aparecen roídos por animais salvaxes, cheiren ben ou teñen cores agradables o son. Todas estas crenzas son erróneas.

O pasado ano rexistráronse un total de sete ingresos por intoxicación de cogomelos, 5 en Lugo, 1 en A Coruña e outro en Pontevedra. 

Noticias de última hora en Vigo

Comentar noticia

Your email address will not be published.