Sanidade pon en marcha o protocolo de actuación da profilaxe pre-exposición ao VIH para persoas que teñen un elevado risco de contraer a infección

A persoa que desexe participar no programa debe solicitar unha cita na súa consulta médica de atención primaria ou na consulta hospitalaria de VIH
Publicado por o día 25/11/2019 na sección de Sanidad

Sanidade pon en marcha o protocolo de actuación da profilaxe pre-exposición ao VIH para persoas que teñen un elevado risco de contraer a infección

A Consellería de Sanidade vai poñer en marcha, dende o vindeiro luns, o protocolo do programa de implementación da profilaxe pre-exposicion (PrEP) ao VIH na nosa Comunidade. Trátase dunha intervención biomédica dirixida a previr a transmisión da infección por este virus en persoas seronegativas que teñen un elevado risco de contraer a infección. A pauta, aprobada pola Axencia Europea do Medicamento, consiste na administración diaria dunha pílula, que contén dous fármacos antirretrovirais.

Sanidade subliña que a oferta da PrEP debe acompañarse dun paquete de medidas preventivas dirixidas a mellorar a adherencia e a adoptar comportamentos de menor risco. Entre estas medidas destacan unha educación sexual integral; a promoción do uso do preservativo; a reducción de danos mediante a inxección hixiénica de drogas e os programas de intercambio de xiringas; o tratamento substitutivo de opiáceos; o diagnóstico e tratamento precoz da infección polo VIH, o cribado doutras infeccións de transmisión sexual; e a actualización do estado vacinal.

Poboación destinataria

A poboación destinataria deste protocolo son os homes que teñen sexo con homes e persoas transexuais seronegativas para o VIH, adultas, que cumpran, polo menos, con dous dos seguintes criterios: máis de 10 parellas sexuais diferentes no último ano; practicar sexo anal sen protección no último ano; uso de drogas asociado ao mantemento de relacións sexuais sen protección no último ano; administración da profilaxe post-exposición ao VIH en varias ocasións no último ano; ou ser diagnosticado polo menos dunha ITS bacteriana no último ano.

Tamén será poboación destinataria as persoas que exercen a prostitución seronegativas que refiran un uso non habitual do preservativo.

Desenvolvemento do programa

A persoa que desexe participar no programa da PrEP debe solicitar unha cita na súa consulta médica de atención primaria ou na consulta hospitalaria de VIH dos 7 grandes hospitais do Sergas (A Coruña, Lugo, Ourense, Pontevedra, Santiago, Vigo e Ferrol). O persoal médico de primaria que reciba a solicitude dunha persoa para participar no programa ofertará, primeiramente, a proba do VIH e dará consello preventivo. Unha vez recibido o resultado da proba de VIH, derivará á persoa solicitante á consulta hospitalaria do VIH. Se o resultado da proba fose positivo, a derivación farase para iniciar o seguimento médico e o tratamento antirretroviral da infección polo VIH. Se fose negativo, a derivación farase para valorar a inclusión da persoa no programa PrEP.

O desenvolvemento do programa é multidisciplinar e o equipo médico e de enfermería das consultas hospitalarias de VIH traballarán en conxunto na organización e desenvolvemento das actividades do mesmo.

Cómpre remarcar que diferentes entidades nacionais e internacionais recomendan o uso desta ferramenta preventiva dentro dunha intervención combinada. Esta recomendación baséase na evidencia achegada por estudos que avalan a efectividade desta intervención cando se mantén unha correcta adherencia ao tratamento.

Comentar noticia

Your email address will not be published.